Nıderlandyda qasqyr alty jastaǵy balaǵa shabýyl jasady

ASTANA. KAZINFORM — Nıderlandynyń Ýtreht qalasynyń mańyndaǵy tabıǵı saıabaqta qasqyr alty jastaǵy balaǵa shabýyldady, dep dpa agenttigine silteme jasap DW  habarlady.

Bala úsh jastaǵy inisimen birge oınap júrgende, syrt beınesi ıtke uqsas janýar olarǵa jaqyndap kelip, oryndyqqa sekirip minip, kenetten shabýyl jasaǵan. Qasqyr balany qoltyq tusynan tistep alyp, butalarǵa qaraı súırep áketýge tyrysqan.

Osy sátte oqıǵa ornyna jaqyn júrgen adamdar men balalardyń ákesi taıaqpen qasqyrdy qýyp, ony toqtatýǵa tyrysqan.

Birneshe mınýtqa sozylǵan kúresten keıin jyrtqysh sheginip, ormanǵa qaraı qashyp ketken.

Jaraqat alǵan bala shuǵyl túrde aýrýhanaǵa jetkizildi. Dárigerler balanyń qoltyq astyndaǵy tis izderin tigip óńdegen. Sonymen qatar keýde tusynda, arqasynda jáne betinde jaraqat baryn anyqtaǵan.

Qasqyr Brem bolýy múmkin

Bul tabıǵı saıabaqta qasqyrlardyń paıda bolýy týraly eskertýler burynnan beri berilip kelgen.

2024 jyly Brem degen at berilgen qasqyr mektep ekskýrsııasy kezinde bir áıeldi aıaǵynan, al balany búıirinen tistep alǵan bolatyn. Sol oqıǵadan keıin bılik janýardy atyp tastaý týraly sheshim qabyldaǵan.

Qazir shabýyl jasaǵan qasqyr Brem boldy ma, joq pa — DNQ saraptamasy arqyly anyqtalady. Saraptama nátıjesi shamamen eki apta ishinde belgili bolady.

Al Atyraý oblysynda sharýa qojalyǵynyń jumysshysyna qasqyr shapqan edi.