Nıderlandyda káriz júıesin jóndeý kezinde vıkıngter kemesiniń bóligi tabyldy
ASTANA. KAZINFORM – Nıderlandynyń Veık-beı-Dıýrstede qalasynda káriz júıesin jóndeý barysynda vıkıngter dáýirine tıesili bolýy múmkin keme bóligi tabyldy. Bul týraly NU.nl portaly habarlady.
Málimetke sáıkes, tabylǵan aǵash bórene sársenbi kúni káriz jáne sý burý júıesin aýystyrý kezinde anyqtalǵan. Jerden shyǵyp turǵan bórene áýesqoı arheologtyń nazaryn aýdaryp, keıin mýnıtsıpalıtet kásibı mamandardy zertteýge tartqan. Aldyn ala baǵalaýǵa qaraǵanda, onyń pishini, oıyqtary men aǵash óńdeý tásili bul bóliktiń keme quramyna tıesili bolýy múmkin ekenin kórsetedi.
Arheologtar sonymen qatar mańaıynan keramıka synyqtaryn da tapqan. Bastapqy qorytyndy boıynsha, bul olja Karolıngter dáýirine, ıaǵnı shamamen bizdiń zamanymyzdyń VIII ǵasyryna jatýy múmkin. Degenmen mamandar onyń keıingi kezeńge — XIV ǵasyrdaǵy kogg saýda kemesine tıesili bolýy yqtımal ekenin de joqqa shyǵarmaıdy.
Tabylǵan bóreneniń uzyndyǵy shamamen 3,2 metr, qalyńdyǵy 30 santımetrge jýyq. Arheolog Anne de Hooptyń aıtýynsha, bastapqyda onyń kólemi budan da úlken bolǵan bolýy múmkin. Aǵashtyń keýip ketýine jol bermeý úshin artefakt dereý qaptalyp, saqtaýǵa jiberilgen.
Naqty jasyn anyqtaý úshin qosymsha zertteýler júrgiziledi, sonyń ishinde aǵashtyń jyldyq saqınalaryn taldaý josparlanǵan. Bul jumystar birneshe aıǵa sozylýy múmkin. Mýnıtsıpalıtet ókilderiniń aıtýynsha, mundaı oljalar óte sırek kezdesedi, al Veık-beı-Dıýrstede buǵan deıin vıkıng kemeleriniń qaldyqtary tabylmaǵan. Jergilikti Dorestad mýzeıi bolashaqta bul artefaktini kórmege qoıýǵa qyzyǵýshylyq tanytyp otyr.
Aıta keteıik, buǵan deıin Norvegııada 800 jyldyq altyn saqına tabylǵan edi.
