Nıderlandyda dınozavr tininen alynǵan materıaldan tigilgen sómke aýktsıonǵa qoıylady
ASTANA. KAZINFORM — Nıderlandyda ǵalymdar men dızaınerler Tyrannosaurus rex qazba qaldyqtarynan alynǵan kollagen qoldanylǵan ınnovatsııalyq materıaldan jasalǵan sómkeni tanystyrdy. Bul týraly Reuters agenttigi jazdy.
Agenttik málimetine súıensek, kógildir tústi buıym Amsterdamdaǵy Art Zoo mýzeıinde dınozavr maketiniń astynda 11 mamyrǵa deıin kórmege qoıylady. Osydan keıin ol bastapqy baǵasy 500 myń eýrodan asatyn aýktsıonǵa shyǵarylmaq.
Joba avtorlarynyń aıtýynsha, materıal ejelgi qazba qaldyqtarynan alynǵan aqýyz fragmentteri negizinde jasalǵan. Bul fragmentter janýar jasýshalaryna engizilip, odan kollagen óndirilgen, keıin ol terige uqsas materıalǵa aınaldyrylǵan.
The Organoid Company kompanııasynyń basshysy Tomas Mıtchell mundaı materıaldy ázirleý barysynda kóptegen tehnıkalyq qıyndyqtar týyndaǵanyn moıyndady. Onyń sózinshe, joba zerthanada ósiriletin bylǵarynyń dástúrli materıaldarǵa qaraǵanda ekologııalyq balama bola alatynyn kórsetýge baǵyttalǵan. Jumysqa VML jáne Lab-Grown Leather kompanııalary da qatysqan.
Sonymen qatar birqatar ǵalymdar «tırannozavr terisi» degen ataýǵa kúmán keltirdi. Amsterdam erkin ýnıversıtetiniń paleontology Melanı Dıýrıng dınozavr súıekterindegi kollagen tek usaq fragmentter túrinde ǵana saqtalatynyn, onyń terini tolyq qaıta jasaýǵa jetkiliksiz ekenin aıtty.
Osyǵan uqsas pikirdi Merılend shtaty ýnıversıtetiniń paleontology Tomas Holts ta bildirdi. Onyń aıtýynsha, qazba qaldyqtarynan tabylǵan kollagen súıek tininen alynǵan jáne terige tán qurylymǵa ıe emes.
Syn pikirlerge jaýap bergen Tomas Mıtchell mundaı kózqarastardy «ǵylymı izdenistiń negizi» dep baǵalap, joba dınozavr qaldyqtarynan alynǵan kollagen negizindegi materıal jasaýǵa barynsha jaqyndaǵanyn málimdedi.
Eske sala ketsek, zańsyz shyǵarylǵan dınozavr qaldyqtary Frantsııadan Mońǵolııaǵa qaıtarylady.
Sondaı-aq jasandy ıntellekt dınozavrlardy izinen anyqtaýdy úırendi.
Al Pokemon kartasy aýktsıonda 16,5 mıllıon dollarǵa satylyp, álemdik rekord ornatty.
