Nıderlandyda balalar qospasynan birneshe náreste ýlandy

ASTANA. KAZINFORM – Nıderlandyda Nestle kompanııasy óndiretin balalar taǵamyn tutynýmen baılanysty bolýy múmkin keminde tórt náresteniń densaýlyǵy nasharlaǵan, dep habarlaıdy Kazinform agenttiginiń menshikti tilshisi.

RTL telearnasynyń málimetinshe, tórt ata-ana dárigerlerge júginip, Nestle ónimderimen tamaqtandyrǵannan keıin balalarynda qusý men ish ótý belgileri baıqalǵanyn aıtqan.

Alaıda ázirge aýrý belgileri men naqty ónim arasyndaǵy tikeleı baılanys túpkilikti dáleldengen joq.

Táýelsiz tutynýshylar uıymy – Foodwatch Eýropanyń ártúrli elderinen alańdaýshylyq bildirgen ata-analardan kóptegen ótinish túskenin málimdedi.

Sonyń biri – Nıderlandy turǵynynyń oqıǵasy. Onyń aıtýynsha, uly Nestle kompanııasynyń sút qospasyn tutyna bastaǵannan keıin kóp uzamaı ózin jaısyz sezingen. Balanyń ishi ótip, álsirep, tábeti joǵalǵan. Dárigerler taǵamnan ýlanýǵa sebep bolatyn toksınder bóletin Bacillus cereus bakterııasyn juqtyrýy múmkin degen boljam aıtqan.

Dál osy bakterııanyń izderi balalar taǵamynyń keıbir úlgilerinen anyqtalýy Nestle bastamasymen ónimdi jappaı keri qaıtaryp alýyna sebep bolǵan.

Kompanııa ókilderi qalyptasqan jaǵdaıǵa baılanysty ókinish bildirip, ónim qaýipsizdigi óz qyzmetindegi basty basymdyq ekenin atap ótti.

Buǵan deıin Nestle, Danone jáne Lactalis kompanııalary toksınderdiń anyqtalýyna baılanysty sút qospalaryn keri qaıtaryp alǵany habarlanǵan bolatyn.