Nıderlandyda bala týý rekordtyq deńgeıge deıin tómendedi
ASTANA. KAZINFORM – Nıderlandyda bala týý kórsetkishi aıtarlyqtaı tómendep, halyqtyń qartaıýyna qatysty alańdaýshylyq kúsheıdi, dep habarlaıdy NU.nl basylymy.
2025 jyly eldegi týý koeffıtsıenti 1,42-ni qurady. Bul statıstıka júrgizile bastaǵannan bergi eń tómen kórsetkish. Al kóshi-qondy eseptemegende halyq sanyn turaqty deńgeıde ustap turý úshin bul kórsetkish shamamen 2,1 bolýy qajet.
Demograf ıAn Lattenniń aıtýynsha, jastardyń bala súıýge degen nıeti aıtarlyqtaı ózgermegen. Orta eseppen olar áli de eki balaly bolǵysy keledi. Alaıda turǵyn úı tapshylyǵy, tabystyń turaqsyzdyǵy jáne áleýmettik-ekonomıkalyq jaǵdaı kóptegen adamnyń bul josparyn júzege asyrýyna kedergi keltiredi.
Nıderland statıstıka basqarmasynyń (CBS) bas áleýmettanýshysy Tanıa Traag jaldamaly baspanada turatyndar men ómir súrý quny joǵary óńirlerdiń turǵyndary arasynda bala týý kórsetkishi tómen ekenin atap ótti. Buǵan qosa, soǵystar men klımattyń ózgerýine baılanysty belgisizdik te áser etip otyr.
– Sarapshylar týý deńgeıiniń uzaq ýaqyt boıy tómen bolýy eńbek naryǵy men densaýlyq saqtaý júıesine salmaq túsiretinin eskertedi. Bolashaqta zeınetkerler sany kóbeıgen kezde olardy qamtamasyz etetin eńbekke qabiletti turǵyndardyń úlesi azaıýy múmkin, – dep jazdy nıderlandylyq basylym.
Qazir Nıderland halqy negizinen kóshi-qon esebinen ósip keledi. Alaıda mamandar mıgratsııany máseleniń uzaqmerzimdi sheshimi dep sanamaıdy.
Mundaı jaǵdaı basqa elderde de baıqalady. Máselen, Ońtústik Koreıada týý koeffıtsıenti shamamen 0,8-ge deıin tómendegen. El bıligi bala týǵandarǵa tólemder men turǵyn úı sýbsıdııalaryn qosa alǵanda, túrli baǵdarlamalarǵa mıllıardtaǵan qarjy jumsady. Norvegııada jas ata-analarǵa qarjylaı qoldaý kórsetilip, ıkemdi jumys kestesin engizý joldary qarastyrylyp jatyr.
Al Frantsııada týý koeffıtsıenti 1,56-ny quraıdy. Elde jastardy otbasyn qurýǵa yntalandyrý sharalary qolǵa alynǵan.
Nıderland úkimeti ázirge bala týýdy tikeleı yntalandyratyn aýqymdy sharalar engizýdi josparlap otyrǵan joq. Bılik mundaı saıasattyń kóbine nátıje bermeıtinin nemese áseri qysqa merzimdi bolatynyn alǵa tartady.
Zertteýshilerdiń pikirinshe, máseleni sheshý úshin ata-analardyń otbasyn qurý josparyn júzege asyrýyna kedergi keltiretin áleýmettik jáne ekonomıkalyq tosqaýyldardy azaıtatyn keshendi sharalar qajet.
Eske sala ketsek, Japonııada demografııalyq quldyraý 45 jyl qatarynan jalǵasyp kele jatqanyn jazdyq.
Al qytaılar qartaıyp barady: aldaǵy 10 jylda 60-tan asqandar sany 400 mln-nan asady.
