Nıderland tropıkalyq ormandardy qorǵaýǵa 500 mln dollar bóledi
ASTANA. KAZINFORM — Nıderland úkimeti aldaǵy on jyl ishinde tropıkalyq ormandardy qorǵaýǵa baǵyttalǵan halyqaralyq qorǵa 500 mıllıon dollarǵa deıin qarajat bólýdi josparlap otyr. Bul týraly Report agenttigine silteme jasaǵan Report habarlady.
Bólinetin qarajat Tropical Forest Forever Facility dep atalatyn jańa memlekettik-jekemenshik ınvestıtsııalyq qor qurýǵa jumsalady. Qordyń negizgi maqsaty — elderdi tropıkalyq ormandardy saqtaýǵa qarjylaı úles qosýǵa yntalandyrý.
Qordyń jalpy kapıtalyn 125 mıllıard dollarǵa deıin jetkizý kózdelgen. Onyń shamamen 100 mıllıard dollary jeke sektor ınvestıtsııalary esebinen qalyptasady. Qordyń taza tabysy ormandardy saqtaýǵa belsendi úles qosyp otyrǵan elderdi júıeli túrde yntalandyrýǵa baǵyttalady.
Aldyn ala esep boıynsha, ormandy saqtap qalǵan elderge ár gektar úshin jylyna shamamen 4 dollar kóleminde tólem jasalýy múmkin. Ormandardyń jaı-kúıi spýtnıktik sýretter arqyly baqylanady.
Nıderland úkimetiniń málimetinshe, qor 900 mıllıon gektarǵa deıingi tropıkalyq ormandy saqtap qalýǵa yqpal etýdi kózdeıdi.
Nıderland buǵan deıin qordy qoldaýǵa ýáde bergen Brazılııa, Indonezııa, Ulybrıtanııa, Norvegııa, Frantsııa jáne Germanııa kiretin elder koalıtsııasyna qosylǵanyn málimdedi.
