Nıderland Rýmynııaǵa F-16 joıǵysh ushaǵynyń 18-in bir eýroǵa beretin boldy

ASTANA. KAZINFORM — Rýmynııa men Nıderland ókilderi Býhareste 18  F-16 Fighting Falcon áskerı ushaqtaryn Rýmynııaǵa sımvolıkalyq bir eýro qunymen berý týraly úkimetaralyq kelisimge qol qoıdy, dep jazdy BELTA.

 

Bul týraly Rýmynııanyń Ulttyq qorǵanys mınıstrligi habarlaǵan.

Rýmynııa alǵashqy F-16 ushaqtaryn Portýgalııadan 2016 jyly alǵan. Qazir elde osy úlgidegi shamamen 50 joıǵysh qoldanysta.

«F-16 ushýlaryna arnalǵan Feteshtıdegi ushqyshtardy daıarlaý ortalyǵynyń qaramaǵynda turǵan bul ushaqtar bir eýro qunymen Rýmynııa memleketiniń menshigine ótedi», — delingen mınıstrlik habarlamasynda.

Vedomstvo Rýmynııa 21 mln eýro kóleminde qosylǵan qun salyǵyn tóleıtinin, ol ushaqtardyń jarııalanǵan quny men 100 mln eýro bolyp baǵalanǵan logıstıkalyq qoldaý paketine negizdeletinin qosty.

Rýmynııanyń qorǵanys mınıstri Ionýts Moshtıaný qol qoıý rásiminde: «F-16 joıǵyshtarynda ushý boıynsha ushqyshtardy daıarlaý ortalyǵy Rýmynııany osy ushaqtary bar nemese bolashaqta bolatyn barlyq memleketter úshin Eýropalyq habqa aınaldyrdy», — dedi.

Kelisim aıasynda Rýmynııa NATO elderi men seriktes memleketterden keletin ushqyshtardy daıarlaý úshin ortalyqta belgili bir oryn berýge mindettendi. Ushaqtardyń tek oqý maqsatynda paıdalanylatyny jáne áskerı operatsııalarǵa tartylmaıtyny naqty aıtyldy.

Eske sala ketsek, buǵan deıin Úndistan Frantsııamen 26 joıǵysh ushaq satyp alý týraly keliskenin jazdyq.