Nıderland premer-mınıstri otstavkaǵa ketti

ASTANA. KAZINFORM — Nıderland premer-mınıstri Dık Shof otstavkaǵa ketetinin jarııalady. Bul sheshim ýltraońshyl saıasatker Gert Vılders óziniń «Bostandyq partııasyn» úkimet quramynan shyǵaratynyn málimdegennen birneshe saǵat ótken soń qabyldandy, dep jazdy Euronews.  

Mundaı jaǵdaı mıgratsııa máselesine baılanysty kelispeýshilikterden týyndady. Úkimettegi koalıtsııa Vılderstiń baspana berýdi toqtatý jáne otbasylardy qaıta qosý protsesin toqtatý týraly josparyn qoldaýdan bas tartty. Vılders bul áreketin koalıtsııa tarapynan qoldaý bolmaǵanyna baılanysty ekenin túsindirdi.

«Bostandyq partııasy saılaýshylarǵa tarıhtaǵy eń qatań baspana saıasatyn júrgizýge ýáde bergen, Eýropadaǵy osy saladaǵy eń qatań elderdiń birine aınalýdy kózdegen. Biz osy máselege qatysty jospar usyndyq… Men koalıtsııa seriktesterinen, endi burynǵy seriktesterimnen qoldaý suradym. Olar qoldamady», — dedi seısenbi kúni partııa jetekshisi jýrnalısterge.

Vılderstiń koalıtsııadaǵy seriktesteri bul sheshimin synǵa alyp, ony «túsiniksiz» ári «jaýapsyz» dep atady. Partııa kóshbasshylary onyń «óz múddelerin el múddesinen joǵary qoıyp otyrǵanyn» aıtty.

Buǵan deıin Nıderlandtaǵy «Bostandyq partııasynyń» jetekshisi Gert Vılders mıgratsııany baqylaý máselelerine baılanysty kelispeýshilikter týyndaǵan soń koalıtsııadan shyǵatynyn málimdegen bolatyn.