Nıderland patshaıymy qarýly kúshter qatarynda qyzmet atqarmaq

ASTANA. KAZINFORM — Nıderland patshaıymy Maksıma eldiń qarýly kúshterine rezervıst retinde qyzmetke kirý týraly sheshim qabyldady. Bul týraly RTL telearnasy habarlady.

Telearnanyń málimetinshe, korol Vıllem-Aleksandrdyń jubaıy áskerı qyzmetti «tolyq emes formatta» óteıdi. Ol aldymen teorııalyq jáne praktıkalyq sabaqtardy qamtıtyn áskerı daıarlyq kýrsynan ótýdi bastaıdy.

Sonymen qatar habar taratýshy rezervısterdiń kásibı áskerı qyzmetkerlermen birge túrli mindetterdi oryndaýǵa tartylýy múmkin ekenin, onyń ishinde tabıǵı apattardyń saldaryn joıýǵa qatysatynyn, al iri qaqtyǵys jaǵdaıynda «kásibı áskerı qyzmetshilerdi ýaqytsha almastyra alatynyn» eske salady.

Qorǵanys mınıstrliginde patshaıymnyń bul sheshimi eń aldymen «sımvolıkalyq mánge ıe» ekenin atap ótip, sonyń arqasynda ásker qataryna qosylǵysy keletin azamattar sany artady dep úmittenedi. Vedomstvo ókilderi sondaı-aq taq murageri, hanshaıym Amalııa áskerı daıyndyqtan óte bastaǵannan keıin de jańa áskerge shaqyrylýshylar sanynyń artqany baıqalǵanyn eske saldy.

RTL dereginshe, el armııasyna qosylý týraly sheshim qabyldardan az ýaqyt buryn patshaımnyń qyzy, taq murageri hanshaıym Amalııaǵa kapral áskerı ataǵy berilgen saltanatty rásimge qatysqan.

Al 2025 jylǵy 30 qyrkúıekte NOS telearnasy Amalııanyń koroldiktiń qarýly kúshteri qataryna qyzmetke kirgenin habarlaǵan. Onyń rezervısterdi daıarlaý baǵdarlamasy boıynsha oqýyn bastaǵany aıtylǵan. Sondaı-aq taq murageriniń Koroldik flotqa, Qurlyq áskerleri men Áýe kúshterine oqýǵa qabyldanǵany, eń tómengi áskerı ataqtardy — tıisinshe úshinshi synypty matros jáne úshinshi synypty sarbaz ataqtaryn alǵany atap ótilgen.

Aıta keteıik, Norvegııada murager hanshaıymnyń ulyna qatysty sot protsesi bastalatynyn jazdyq.