Nıderland parlamenti otshashýlar men merekelik jarylǵysh zattarǵa tyıym saldy

ASTANA. KAZINFORM – Nıderlandyda aldaǵy jańa jyl túni turǵyndar otshashýlar men turmystyq jarylǵysh zattardy sońǵy ret qoldana alady, dep habarlaıdy BILD.

Parlament qabyldaǵan sheshimge sáıkes, kelesi jyldan bastap mundaı buıymdardy jeke tulǵalardyń paıdalanýyna tolyq tyıym salynady. Endi otshashýlardy tek kásibı shoý uıymdastyrýshylary ǵana qoldana alady.

Tyıym kúshine enetinin eskergen turǵyndar jańa jyl qarsańynda otshashý satyp alýǵa asyqqan. Sonyń saldarynan otshashý ónimderiniń satylymy kúrt ósip, bıyl bul kórsetkish ótken jylmen salystyrǵanda shamamen 20 paıyzǵa artady dep kútilip otyr. Osyǵan baılanysty órt sóndirý qyzmeti, aýrýhanalar men polıtsııa aldaǵy túnniń aýyr ótýi múmkin ekenin eskertken.

Polıtsııa málimetinshe, sońǵy aılarda qýaty joǵary jarylǵysh zattardyń zańsyz ákelinýi de kóbeıgen. Jeltoqsan aıynyń ortasyna deıin quqyq qorǵaý organdary 65 myń keliden astam zańsyz pırotehnıkalyq buıymdy tárkilegen. Qarasha aıynan jeltoqsannyń ortasyna deıin osyndaı jarylǵysh zattardy qoldaný saldarynan kóptegen adam jaraqat alǵan. Qol hırýrgııasy qaýymdastyǵynyń dereginshe, on jasóspirimniń qoly nemese saýsaqtary kesilgen.

Al 2024 jyly mundaı jaǵdaılar nebári tórt ret tirkelgen.

I&O Research ınstıtýty júrgizgen saýalnama nátıjesine sáıkes, Nıderland turǵyndarynyń 62 paıyzy otshashýlar men jarylǵysh zattarǵa tyıym salýdy qoldaıdy. Sońǵy jyldary polıtseıler, órt sóndirýshiler men qutqarýshylar otshashýlardy paıdalaný kezinde jıi shabýylǵa ushyrap, jaraqat alǵan. Osyǵan baılanysty dárigerler, polıtsııa, mýnıtsıpalıtetter, janýarlar men qorshaǵan ortany qorǵaýshylar bul tyıymdy kópten beri talap etip kelgen.

Buǵan deıin Germanııada dárigerler otshashýǵa tyıym salýdy usyndy.