Nıderland ortalyǵynan 4 000 jyl burynǵy qasıetti oryn tabyldy

AMSTERDAM. QazAqparat – Arheologtar Nıderland ortalyǵynan aryqtar men qorǵandardan turatyn 4 000 jyl burynǵy qasıetti oryndy tapty, dep habarlaıdy QazAqparat CNN-ge silteme jasap.

Anglııanyń ońtústigindegi áıgili tastan jasalǵan qurylysqa uqsaıtyn, kólemi jaǵynan úsh fýtbol alańyna teń keletin qasıetti oryn topyraq pen aǵashtan turǵyzylǵan.

Arheologtar bul jerden janýarlar qańqasyn, adamnyń bas súıekteri jáne naızanyń ushy sııaqty qundy zattardy tapty.

Qazba jumystary Rotterdamnan shyǵysqa qaraı 70 shaqyrym jerde ornalasqan Tıl qalasynyń mańynda júrgizilgen.

«Eń úlken qorǵan Anglııadaǵy áıgili Stoýnhendj tastary sııaqty kún kúntizbesi qyzmetin atqarǵan. Bul kıeli jer jyldyń erekshe kúnderi atalyp ótetin, yrymyn jasap, qaıtys bolǵandardy jerleıtin asa mańyzdy oryn bolsa kerek. Sherýlerge arnalǵan joldardyń boıynda qatar-qatar baǵanalar tur», - delingen Tıl qalasy ákimshiliginiń habarlamasynda.

2017 jyly qazba jumystary kezinde de arheologtar birneshe beıitti tapqan. Mamandar tas ǵasyry, qola dáýiri, temir dáýiri, Rım ımperııasy jáne orta ǵasyrlarǵa jatatyn mıllıonnan astam qazylǵan zatty zertteýge alty jyl ýaqyt jumsady.

Qurylys jumystaryn jalǵastyrý úshin qazba jumystary aıaqtalǵannan keıin alańnyń beti qaıta jabylǵan.

Tabylǵan zattardyń bir bóligi jergilikti Tıl murajaıyna jáne Nıderland Ulttyq kóne jádigerler murajaıyndaǵy kórmege qoıylady.