Nıderland mınıstrleri Izraılge qatysty daýdan keıin otstavkaǵa ketti
ASTANA. KAZINFORM – Nıderlandtyń Syrtqy ister mınıstri, tsentrıstik «Jańa qoǵamdyq kelisim» (NSC) partııasynyń ókili Kaspar Veldkamp Izraılge qarsy sanktsııalar jónindegi daýdan keıin otstavkaǵa ketti. Bul týraly ol ANP agenttigine bergen suhbatynda habarlady. Veldkamptyń qadamynan keıin onyń partııasynan barlyq mınıstrler qyzmetterin tastady, dep jazady DW.
Alaıda dpa agenttiginiń málimetinshe, birqatar mınıstrdiń qyzmetinen ketýi Nıderland ishki saıasatyna aıtarlyqtaı áser etpeıdi. Sebebi buǵan deıin-aq bıliktegi koalıtsııa ońshyl-popýlıstik «Erkindik partııasy» (PVV) shyqqannan keıin kópshilikke ıe bolmaı qalǵan edi. Qazir partııasy joq premer-mınıstr Dık Shof basqaratyn úkimette tek ońshyl-lıberaldyq «Bostandyq pen demokratııa úshin halyqtyq partııa» (VVD) men ońshyl-popýlıstik «Fermerlik-azamattyq qozǵalys» (BBB) ǵana qaldy.
Izraıl tóńiregindegi daý-damaı
Buǵan deıin Kaspar Veldkamp Gaza sektoryndaǵy operatsııa aıasynda Izraıl úkimetine qatysty qatań sharalar qoldaný qajettigin málimdegen bolatyn. Alaıda ol bul másele boıynsha koalıtsııa seriktesterinen qoldaý tappaǵanyn aıtty.
Shilde aıynyń sońynda Izraıldiń ulttyq qaýipsizdik mınıstri Itamar Ben-Gvır men qarjy mınıstri Betsalel Smotrıch Nıderlandta persona non grata dep jarııalandy. Olarǵa palestınalyqtarǵa qarsy birneshe márte zorlyq-zombylyqqa shaqyrdy degen aıyp taǵyldy.
Sondaı-aq Nıderland úkimeti Ben-Gvır men Smotrıchti Shengenniń SIS derekter bazasyna «Shengen aımaǵyna kirýi qalaýsyz sheteldik azamattar» retinde engizýdi kózdegen.
HAMAS-tyń Izraılge shabýyly jáne onyń saldary
Taıaý Shyǵystaǵy jaǵdaı 2023 jylǵy 7 qazanda kúrt ýshyǵyp ketti. Eýropalyq odaq pen AQSh-ta terrorıstik uıym dep tanylǵan HAMAS qozǵalysy Izraılge aýqymdy shabýyl jasady. Boevıkter jappaı zymyrandyq soqqy berip, el aýmaǵyna basa kóktep kirdi jáne qazirgi Izraıl memleketi tarıhyndaǵy beıbit halyqqa jasalǵan eń qandy qyrǵyndy uıymdastyrdy. Shamamen 1200 adam qaza tapty. Sonymen qatar, 250-den astam adamdy tutqyndap, Gazadaǵy anklavqa alyp ketti. Keıbir tutqyndar aıyrbastaldy nemese bosatyldy, bir bóligi qaza tapty.
Izraıl jaýap retinde HAMAS-qa soǵys jarııalady. Qurlyqtaǵy operatsııalar men Gaza sektoryna jasalǵan áýe shabýyldary nátıjesinde 62 myńnan astam palestınalyq qaza taýyp, 157 myńnan astamy jaralandy, dep habarlaıdy HAMAS baqylaýyndaǵy Densaýlyq saqtaý mınıstrligi. Alaıda atalǵan derekterdiń qalaı jasalǵany belgisiz: mysaly, qaza tapqandardyń arasynda qansha ıslamıstik jasaq bolǵany nemese aýrýhanalardaǵy tabıǵı ólim-jitim esepke alynǵan-alynbaǵany kórsetilmegen.