Nıderland mektepterinde mobıldi telefonǵa tyıym salynbaq

ASTANA. QazAqparat – Nıderland mektepterinde mobıldi telefonǵa tyıym salynady. Portatıvti tehnıka gollandııalyq oqýshylardyń úlgerimine zııandy dep tapqan. Bul týraly QazAqparat Euronews-ke silteme jasap habarlaıdy.

Nıderland mektepterinde mobıldi telefon paıdalanýǵa tyıym salý engizile bastady. Eldiń bilim mınıstrligi túsindirgendeı, bul shara balalardyń sabaqtan basqa nársege alańdamaýyna septigin tıgizedi. Oqý mekemeleri úkimettiń bastamasyna qoldaý bildirip, shekteýge kelisim bergen.

«Biz zań júzinde tyıym salmaımyz. Bul talaptyń áseri qandaı bolatynyn muqııat baıqap kórmekpiz. Árıne, qashanda zańdy shekteýlerdi engizýge bolady. Biraq, meniń oıymsha, biz ózara kelisimge kele alamyz», - deıdi Nıderland bilim mınıstri Robert Deıkgraaf.

Alaıda, oqýshylardyń kóbi bul ıdeıany qýana qabyldap jatqan joq. Olar telefonnyń qajettigin alǵa tartady.

Mektepterde mobıldi telefondar, planshetter men «aqyldy saǵattardy» paıdalanýǵa tyıym salý 1 qańtardan bastap kúshine enedi. Naqty shekteýler muǵalimdermen, balalarmen jáne olardyń ata-analarymen de kelise otyryp engiziledi dep josparlanǵan.