Nıderland vırýs taraǵan kemedegi barlyq jolaýshyny 6 aptalyq karantınge jabady
ASTANA. KAZINFORM – Nıderland bıligi bortynda hantavırýs taralǵan MV Hondius krýız kemesiniń jolaýshylary men ekıpaj múshelerin elge oralǵannan keıin alty aptalyq úı karantınine jibermek. Bul týraly NU.nl portaly habarlady.
Nıderland bıligi Kanar araldaryna laıner kelgennen keıin elge oralatyn on azamattyń densaýlyǵyna alańdap otyr. Alaıda bılik ázirge azamattardyń oqshaýlaý rejımin saqtaýyn qalaı baqylaıtynyn naqty sheshpegen.
Buǵan deıin Nıderland bıligi 6 jáne 7 mamyr kúnderi eki evakýatsııalyq reıspen koroldikke jetkizilgen Hondius kemesindegi úsh adamnyń aýrýhanaǵa jatqyzylǵanyn habarlaǵan edi. Olar eldiń ártúrli medıtsınalyq mekemelerine, sonyń ishinde Neımegen jáne Leıden qalalaryndaǵy aýrýhanalarǵa ornalastyryldy.
MV Hondius kemesi Kanar araldaryna 10 mamyrda jetedi dep kútilip otyr. Buǵan deıin keme bortyndaǵy segiz adamnan hantavırýs anyqtalǵan.
Jolaýshylardyń úsheýi, sonyń ishinde Nıderlandydan kelgen erli-zaıypty kóz jumdy. Taǵy bir naýqas Iohannesbýrg qalasyndaǵy aýrýhanada aýyr jaǵdaıda jatyr.
Infektsııanyń ári qaraı taralýyn boldyrmaý úshin jolaýshylarǵa kaıýtalarynan shyqpaý tapsyrylǵan. Alaıda hantavırýstyń ınkýbatsııalyq kezeńi birneshe aptaǵa sozylýy múmkin bolǵandyqtan, jańa jaǵdaılardy jedel anyqtaý qıyndap otyr.
Eske sala ketsek, buǵan deıin Kabo-Verde bıligi «Hondius» laınerinen naýqastardy evakýatsııalaýdy qolǵa alǵanyn habarladyq.
Al 6 mamyr kúni hantavırýs anyqtalǵan laınerdegi jolaýshylar saıahatty jalǵastyratyny belgili boldy.
