Nıderland Qazaqstanǵa 20 jylda 124 mlrd dollar ınvestıtsııa saldy
ASTANA. KAZINFORM — Qazaqstan men Nıderland arasyndaǵy taýar aınalymy 2025 jyly 11 paıyzǵa ósip, 6 mıllıard dollardy asty. Bul Astanada ótken Qazaqstan–Nıderland Іskerlik keńesiniń II otyrysynda jarııalandy.
Іs-sharaǵa eki el elshileri, Syrtqy saýda palatasy, BeNıNıýks saýda palatasy, sondaı-aq isker toptarynyń ókilderi qatysty. Otyrysta saýda-ekonomıkalyq jáne ınvestıtsııalyq yntymaqtastyqtyń nátıjeleri qorytyndylanyp, bolashaq yntymaqtastyq baǵyttary aıqyndaldy.
Nıderland 2005–2025 jyldary aralyǵynda Qazaqstan ekonomıkasyna 124 mıllıard dollardan astam tikeleı ınvestıtsııa saldy. Qazirgi ýaqytta elimizde nıderland kapıtalynyń qatysýymen 700-den astam kompanııa jumys isteıdi.
Qazaqstannyń Syrtqy saýda palatasy Basqarma tóraǵasy mindetin atqarýshy Dana Qasymova otyrysta Nıderlandynyń mańyzyn atap ótti.
— Búgingi kezdesý Qazaqstan men Nıderland kásibiniń saýda-ekonomıkalyq jáne ınvestıtsııalyq yntymaqtastyqty odan ári nyǵaıtýǵa degen ózara joǵary qyzyǵýshylyǵyn taǵy bir márte dáleldeıdi. Qazaqstannyń ekonomıkalyq áleýeti men Nıderlandynyń ınnovatsııalyq tájirıbesiniń úılesýi jańa birlesken jobalardy iske asyrýǵa berik negiz qalyptastyrady dep senemiz, — dedi ol.
Qazaqstan Nıderlandyǵa negizinen munaı, ferroqorytpalar jáne tıtan eksporttaıtyn bolsa, Nıderlandydan dárilik zattar, medıtsınalyq jabdyqtar, mashınalar men aýyl sharýashylyǵy ónimderin tasymaldaımyz.
Aıta keteıik, Qazaqstan men Nıderland arasyndaǵy taýar aınalymy 6 mlrd dollarǵa jetkenin habarlaǵan edik.
