Nıderland bıligi 15 jasqa deıingi balalarǵa áleýmettik jelilerdi paıdalanýǵa tyıym salýdy usyndy
ASTANA. KAZINFORM — Nıderland bıligi TikTok jáne Instagram sııaqty áleýmettik jelilerdi 15 jasqa deıingi balalar men jasóspirimderge paıdalanýǵa tyıym salýdy, smartfon aldynda ótkizetin ýaqytty qatty shekteýdi, sondaı-aq balalar bólmesinde ekrandy qurylǵylardy qoldanýǵa tyıym salýdy usynady, dep jazdy Euronews.
Eldiń Densaýlyq saqtaý mınıstrligi atap ótkendeı, áleýmettik jelilerde únemi ýaqyt ótkizý psıhologııalyq jáne fızıologııalyq máselelerge ákeledi. Olardyń ishinde uıqynyń buzylýy, depressııa, úreı (panıkalyq shabýyldar) sııaqty problemalar bar. Bul tujyrymdy Nıderland parlamentiniń sarapshylar toby da rastady.
2024 jyldyń aqpan aıynda Nıderland korolevasy Maksıma da osy máselege toqtalyp, kenje qyzy Arıananyń kórý qabiletiniń nasharlaýyna smartfon aldynda kóp ýaqyt ótkizýi sebep bolǵanyn aıtqan.
TikTok pen Instagram qazirdiń ózinde paıdalanýshylardan kem degende 13 jasta bolýyn talap etedi. Alaıda nıderlandtyq dárigerler bul jasty tek qarapaıym messendjerler (mysaly, WhatsApp nemese Signal) sekildi áleýmettik fýnktsııasy shekteýli platformalardy qoldaný úshin ǵana jaramdy dep esepteıdi.
Nıderland mektepterinde smartfon qoldanýǵa tyıym salynǵan, biraq jańa usynystar ázirge zańdy kúshi bar shekteýler emes.
Birqatar Eýropa elderi de osyǵan uqsas zań jobalaryn talqylap jatyr. Keıbir memleketterde jasóspirimderge áleýmettik jelilerde akkaýnt ashý úshin ata-ananyń ruqsaty talap etiledi.
Ázirge áleýmettik jelilerdi jasóspirimderge tolyǵymen tyıym salǵan jalǵyz el — Aýstralııa. Ondaǵy jańa zań 2024 jyldyń qarasha aıynda kúshine enedi.
Eske sala keteıik, buǵan deıin Frantsııa prezıdenti Emmanýel Makron 15 jasqa deıingi balalarǵa áleýmettik jelilerdi paıdalanýǵa tyıym salý bastamasyn jarııalaǵan edi.