Nıderland alǵash ret Izraıldi ulttyq qaýipsizdikke qater tóndiretin el dep tanydy
ASTANA. KAZINFORM — Nıderland lańkestikke qarsy agenttiginiń baıandamasynda Izraıl men AQSh qaýip-qater tóndiretin elder ataldy, dep habarlaıdy Kazinform menshikti tilshisi.
Nıderland tarıhynda alǵash ret Izraıldi ulttyq qaýipsizdikke qater tóndiretin elder tizimine qosty. Bul týraly Ádilet jáne qaýipsizdik mınıstrligi janyndaǵy Qaýipsizdik jáne lańkestikke qarsy ulttyq úılestirýshi (NCTV) — eldiń lańkestikpen kúres jónindegi bas agenttigi baıandamasynda habarlandy.
Baıandama «Sheteldik memleketter tarapynan qaýip-qaterdi baǵalaý» dep atalady, onda Izraıl men AQSh áreketteri Nıderland qaýipsizdigi men egemendigine qaýip tóndirýi múmkin elder retinde ataldy.
Atap aıtqanda, Izraıl el bıliginiń kelisiminsiz Nıderland azamattarynyń jeke derekteri bar qujattardy taratyp, jalǵan aqparat taratý naýqandaryn qoldanyp eldegi qoǵamdyq pikir men saıası sheshimderge yqpal etýge árekettengen delinedi.
«Makkabı» jankúıerleri
Baıandamaǵa sáıkes, 2024 jyldyń qarashasynda Amsterdamda «Makkabı Tel-Avıv» klýbynyń jankúıerleri týdyrǵan tártipsizdikterden keıin Izraıl bıligi gollandııalyq tilshiler men sheneýnikterge Nıderland azamattarynyń jeke derekteri bar materıaldardy taratqan. Bul ádilet jáne qaýipsizdik mınıstrlikterinde, sondaı-aq Syrtqy ister mınıstrliginde alańdaýshylyq týdyrdy. Olar zardap shekkenderge qatysty qýdalaý, qorqytý jáne tipti yqtımal zorlyq-zombylyq qaýpi týraly eskertti.
— Biz aqparattyq keńistikke yqpal etý jáne memleketaralyq ózara is-qımyldyń dástúrli arnalaryn aınalyp ótý áreketterin baıqap otyrmyz, — delingen habarlamada.
Sotqa qoqan-loqqy kórsetý
Qujatta sondaı-aq Izraıl men AQSh tarapynan Gaagadaǵy Halyqaralyq qylmystyq sotqa (HQK) qaýip tónip turǵany atap ótilgen. Baıandamada sotqa qarsy qysym men qoqan-loqqy onyń jumysyna keri áserin tıgizýi múmkin ekendigi atap ótildi.
Eske sala ketsek, 2024 jyly sot Izraıl premer-mınıstri Bınıamın Netanıahý men burynǵy qorǵanys mınıstri Ioav Galantty Palestına aýmaǵynda áskerı qylmys jasady degen kúdikpen qamaýǵa alýǵa order bergen bolatyn. Osydan keıin AQSh sotqa sanktsııa saldy, al Izraıl tarapy qysym jasaý naýqanyn kúsheıtti.
Byltyr mamyr aıynda HQS Izraıl men AQSh bıligi Izraıl basshylyǵynyń ókilderin tutqynǵa alýǵa order bergen jaǵdaıda sottyń zardaptary týraly eskertkennen keıin oǵan qarsy qoqan-loqqyny toqtatýdy talap etken.
Karim Khan, the British chief prosecutor of the International Criminal Court was warned in May that if arrest warrants for Israeli Prime Minister Benjamin Netanyahu and former Defence Minister Yoav Gallant were not withdrawn, he and the ICC would be «destroyed», Middle East Eye… pic.twitter.com/OQXpR1XNAk
— Middle East Eye (@MiddleEastEye) July 15, 2025
Aýmaǵynda Halyqaralyq sot pen BUU Halyqaralyq sotyn qosa alǵanda halyqaralyq sot organdary ornalasqan Nıderland olardyń táýelsizdigi men úzdiksiz jumys isteýin qamtamasyz etý úshin óziniń erekshe jaýapkershiligin atap kórsetedi.
Baqylaýshylardyń atap ótýinshe, bul baıandama birneshe eýropalyq el, sonyń ishinde Nıderland, Irlandııa jáne Ispanııanyń Gaza sektoryndaǵy jalǵasyp jatqan áskerı operatsııaǵa jáne sektordaǵy gýmanıtarlyq jaǵdaıdyń nasharlaýyna baılanysty Izraıldi synaýynyń kúsheıýi tusynda jasalǵan.
«Non grata» mınıstrleri
Gollandııalyq BAQ-tyń habarlaýynsha, Nıderland bıligi Izraıl úkimetiniń músheleri — Qarjy mınıstri Betsalel Smotrıch pen Ulttyq qaýipsizdik mınıstri Itamar Ben-Gvırdiń elge kirýine tyıym salǵan.
BREAKING:
— Globe Eye News (@GlobeEyeNews) July 29, 2025
The Netherlands has banned Israeli ministers Ben-Gvir and Smotrich from entering the country. pic.twitter.com/DnUvhFsEtT
Algemeen Dagblad gazetiniń málimetinshe, Nıderlandtyń syrtqy ister mınıstri Kasper Valdekamp parlamentke hat joldap, onda bul tyıym eki ızraıldik saıasatkerdiń de «turǵyndardy Palestına halqyna qarsy birneshe ret zorlyq-zombylyq kórsetýge shaqyrýy jáne… Gazada etnıkalyq tazalaýdy talap etýine» baılanysty ekenin atap ótti.
— Maǵan búkil Eýropada tyıym salynsa da, men elimiz úshin kúresýdi, HAMAS-ty joıyp, jaýyngerlerimizdi qoldaýdy jalǵastyramyn. Bizdiń jaýlarymyz — qatygez óltirýshiler men zorlaýshylar, biraq Eýropada ózin qorǵaǵan adam kináli. Olar sol jerde lańkesterdi qabyldaıdy, biraq evreı mınıstrin — joq, — dep jazdy Ben-Gvır Nıderland sheshimine jaýap retinde X-tegi platformasynda.
Kirýge tyıym salý týraly sheshim Nıderland premer-mınıstri Dık Shof el Izraıldiń ǵylymı jobalaryn qarjylandyrýdy ishinara toqtatý týraly EO bastamasyn qoldaýmen qatar, Izraılge qarsy ulttyq sharalar engizýdi qarastyryp jatqanyn málimdegennen keıin kóp uzamaı qabyldandy.
Buǵan deıin Gaza sektoryna jasalǵan Izraıl soqqylarynan 30-dan astam adam qaza tapqanyn jazǵanbyz.