Nıderland áleýmettik qashyq shekteýin alyp tastady

NUR-SULTAN. QazAqparat – Nıderland Koroldiginde 18 aıdaı ýaqyt ótken soń koronavırýs pandemııasy jaǵdaıynda qalypty ómirge qaıtyp oralýǵa úlken qadam jasap otyr, dep habarlaıdy QazAqparat DW saıtyna silteme jasap.

14 qyrkúıek kúni Nıderlandy premer-mınıstri Mark Rıýtte 25 qyrkúıekten bastap koroldikte 1,5 metr áleýmettik qashyqty saqtaý erejesi joıylatynyn málimdedi. Bul adamdardyń kópshilik jınalatyn kontsert, teatr, meıramhanalar men dámhanalarǵa barýyna múmkindik beredi. Endi eldiń joǵarǵy fýtbol dıvızıonynyń matchtary 2020 jyldyń kókteminen beri adam tolyq jınalǵan stadıondarda ótedi.

Qoǵamdyq tamaqtaný oryndary, mádenı jáne sport sharalaryna kelýshiler ekpe jasalǵany kórsetilgen kovıd qujatyn nemese koronavırýspen aýyrǵany týraly anyqtamany, ne SARS-CoV-2 vırýsyna anyqtaıtyn testiniń teris nátıjesin usynýy tıis. Bul rette koroldik úkimetiniń basshysy azamattardy saq bolýǵa úndedi.

«Bul koronavırýs pandemııasyna deıingi ýaqyt emes, sebebi ınfektsııa juqtyrý oqıǵalary áli de kóp, aýrýhanalarda dertke shaldyqqan adamdar áli qanshama», - dedi Rıýtte.

Onyń aıtýynsha, ınfektsııanyń kúzde qalaı órbıtini belgisiz. El úkimeti kovıd qujatyn engizý arqyly turǵyndardy vaktsına alýǵa yntalandyrmaq. Búginde Gollandııa azamattarynyń 63 paıyzǵa jýyǵy ekpe saldyrtqan. Medıtsına bıliginiń baǵalaýynsha, qazirgi kezde elde ınfektsııanyń iri oshaǵy – mektepter. Aýrýhanalardaǵy jaǵdaı azdap jaqsarǵan, biraq áli de kúrdeli bolyp qalýda.