Nıderland AQSh pen Kanadadaǵy altyn qorynyń bir bóligin shyǵardy
ASTANA. KAZINFORM — Nıderlandtyń Ortalyq banki (DNB) geosaıası turaqsyzdyqtyń kúsheıýine baılanysty altyn qorynyń 86 tonnasyn AQSh pen Kanadadan Londonǵa kóshirgenin málimdedi, dep habarlaıdy Kazinform agenttigi The Guardian basylymyna silteme jasap.
Bul sheshim AQSh pen Kanada arasyndaǵy jalǵasyp jatqan saýda daýy aıasynda qabyldandy. Saýda kelissózderi nátıjesiz aıaqtalǵannan keıin eki el bir-birine jańa baj salyǵyn engizetinin jarııalaǵan bolatyn.
Banktiń málimetinshe, Londonda saqtalǵan altyn qoryn Nıý-Iork pen Ottavadaǵy qorlarǵa qaraǵanda satý ońaıyraq.
— Bul qadam altyn qoryn paıdalaný múmkindigimizdi arttyrdy. Altyn qoryn eshqashan paıdalanýǵa týra kelmeıdi dep úmittenemiz. Degenmen bul bizdiń turaqtylyǵymyz ben kez kelgen jaǵdaıǵa daıyndyq deńgeıimizdi kúsheıtý úshin qajet, — dedi DNB prezıdenti Olaf Sleıpen.
DNB málimetinshe, Nıderlandtyń 2025 jyldyń sońyndaǵy jalpy altyn qory 612,4 tonnany qurap, onyń quny 72,2 mlrd eýroǵa (83,7 mlrd dollar) baǵalanǵan.
Altyn qoryn qaıta ornalastyrý bastalǵanǵa deıin Nıderland banki altyn qorynyń 31,3%-yn Nıý-Iorkte, 19,7%-yn Ottavada saqtaǵan. Qazir bul kórsetkish eki elde de 18,5%-ǵa deıin tómendedi. Al Londonda saqtalatyn altynnyń úlesi 18,1%-dan 32,1%-ǵa deıin ósti. Sonymen qatar bank altyn qorynyń 30,8%-yn Nıderlandta saqtap otyr.
DNB málimetinshe, altyndy tasymaldaý jumystary 2026 jylǵy naýryz ben tamyz aralyǵynda júrgizilgen. 27 tonna altyn quımasy Nıý-Iork pen Ottavadan Nıderlandtyń Zeıst qalasyna jetkizildi.
Atlant muhıty arqyly munsha kólemdegi altyndy tasymaldaýdyń naqty tásili ázirge jarııalanǵan joq.
Altyn qorynyń qalǵan bóligi Nıý-Iorkte satylyp, keıin Londonda qaıta satyp alý arqyly aýystyrylǵan.
Buǵan deıin elimizde bir gramm altyn qansha turatynyn jazǵan bolatynbyz.
