Nıtstsadaǵy qandy oqıǵa: Qazaqstandyq azamat qalaı ajaldan aman qaldy?
ASTANA. QazAqparat - Qazaqstandyq Meıram Qazıev Nıtstsadaǵy qandy oqıǵaǵa tap bola jazdaǵan.
«Taǵdyr. Shilde aıynyń basynda otbasymyzben Nıtstsaǵa jáne Parıjge baryp qaıtamyz dep sheshtik. Astana - Parıj - Astana reısine bıletke tapsyrys berip qoıdyq, endi Parıj-Nıtstsa baǵytyna bılet izdeı bastadyq. Alaıda bizdiń astanamyzdan Parıjge ushaq jergilikti ýaqytpen 18:00-de kelip qonady, al Nıtstsaǵa sońǵy reıs 19:00-de eken. Qalaıda úlgermeıtin boldyq. Ýaqyt joǵaltpas úshin Parıjde birneshe kún bolyp, odan keıin Nıtstsaǵa ushamyz dep sheshtik.
Sonymen, 13 shilde, sársenbi kúni Sharl de Gol áýejaıyna kelip qondyq. Qonaq úıge ornalastyq, kósheler men mýzeılerdi araladyq, bári tamasha ótip jatty. 15 shilde, juma kúni tań sáride (ýaqyt aıyrmashylyǵy 4 saǵat) pavlodarlyq tanys joldasymnyń qońyraýy shyrt uıqydan oıatty: «Amansyńdar ma? Qaıdasyńdar?». Áýelde túsinbeı qaldym. Al, ol bolsa: «Teledıdardy qos», - deıdi. Bul kezde kógildir ekrannan barlyq arnalar Nıtstsadaǵy terakt týraly habar taratyp jatqan bolatyn.
Dál osy ýaqytta biz sol jerde bolýymyz kerek edi. Tipti, Aǵylshyn jaǵalaýyndaǵy qonaq úıden bólme de alyp qoıǵanbyz. Tek keıin keshki reıstiń bolmaýynan bul sapardy eki-úsh kúnge keri shegergen edik. Shynynda, biz de osy otshashýǵa barar edik qoı. Osydan soń qalaı taǵdyrǵa senbeısiń? Aldaǵy kúnderi báribir Nıtstsaǵa ushqaly otyrmyn. Qaıǵyly oqıǵa ornyna baramyn, jazyqsyz qaza tapqandardyń qurmetine gúl shoqtaryn qoıamyn. Sebebi, ol jerde men jáne meniń otbasym da bolýy múmkin edi. Bir túrli muń basady eńseńdi...», dep jazdy M.Qazıev óziniń Feısbýktegi paraqshasynda.
Esterińizge sala keteıik, 14 shilde kúni túnde Bastılııa qamalynyń alynýy merekesine oraı uıymdastyrylǵan otshashýdan soń Nıtstsa qalasynyń Aǵylshyn jaǵalaýynda jınalǵan jurtty júk kóligin mingen lańkes taptap ótken edi, Oqıǵa saldarynan 84 adam qaza taýyp, 100-den astamy jaralanǵan bolatyn.
