Nıagara ózenindegi tasqyn 100 jyl buryn jartasqa tirelip qalǵan kemeni aǵyzyp ketti
NUR-SULTAN. QazAqparat - Nıagara ózeniniń túbindegi jartastarǵa 100 jyl buryn tirelip, sonda qalyp qoıǵan kemeni qatty daýyl men sý tasqyny aǵyzyp ketti, dep habarlaıdy QazAqparat CBS telearnasyna silteme jasap.
Uzyndyǵy 20 metrden asatyn barja 1918 jyldyń tamyzynda ózin súıregen kemeden úzilip ketkendikten, ony ekıpaj Nıagara ózeniniń Kanada bóligine shóktirgen. Sodan beri Taǵa sarqyramasynan (Kanada sarqyramasy) 1,5 shaqyrym jerde jatqan keme Nıagara kesheniniń týrıster qyzyqtaıtyn oryndardyń birine aınalǵan bolatyn.
Tolassyz jaýǵan nóserden sý deńgeıi kóterilip, ony 50 metrdeı jerge deıin jyljytqan. Shókken kemeni ózenniń aǵyzýyna dál sol baǵytta soqqan qatty daýyl da septigin tıgizgen.
Kanadanyń Nıagara parkiniń komıssııasy ózenniń kemeni birtindep sarqyramaǵa deıin aǵyzyp aparýy múmkin dep boljap otyr.
