NFC chempıony Eraly Ábdirov: Daýys berý – bir paraqqa belgi qoıý emes

AQTAÝ. QazAqparat – Saıası naýqannan qalys qalmaı, el bolashaǵy úshin daýys berýge kelgenderdiń biri – NFC chempıony Eraly Ábdirov, dep habarlaıdy QazAqparat.

Saılaý – Jańa Qazaqstandy qalyptastyrýdaǵy mańyzdy qadamdardyń biri dep sanaıtyn Eraly óz tańdaýyn jasaý úshin 19 naýryzdy asyǵa kútken.

E. Ábdirov Aqtaý qalasynyń mártebesin kóterip, sporttyq qarym-qabileti arqyly oblys atyn tanytýǵa zor úles qosyp júrgen sportshy. Onyń búginge deıin jetken jetistigi az emes. Máselen, 2015 jyly kýdodan Qazaqstan chempıony, 2016 jyly Azııa chempıony, MMA sportynan Qazaqstan chempıony atanǵan. 2018 jyly Halyqaralyq týrnırde eresekter arasynda 71 keli salmaq dárejesinde NFS (Naiza Fighting Championship) belbeýiniń ıegeri atandy.

«Saılaý — óz ýchaskeńe baryp, bir paraqqa belgi qoıý emes, eldiń bolashaǵyna alańdap, onyń damýyna úles qosý. Jańa Qazaqstannyń bolashaǵyna daýys berdim. Qazaqstan jastardyń qolynda dep senemin. Daýys berý – ár azamattyń paryzy. Sondyqtan qala turǵyndaryn saılaýda belsendi daýys berip, durys tańdaý jasaýǵa shaqyramyn», - deıdi sportshy.