Neıtrondy ashqan fızıktiń Nobel medali aýktsıonda $329 myń satyldy
ASTANA.QazAqparat - Neıtrondy ashqan aǵylshyn ǵalymy Djeıms Chedvıktiń (1891-1974) Nobel medali Nıý-Iorktegi Sotheby's aýktsıon úıindegi saýdada 329 myń dollarǵa satyldy. Bir lotqa medalmen birge Nobel syılyǵy laýreatynyń dıplomy da endi.
"Chedvık óz jańalyǵyn medıtsınada qoldanylady dep úmittengen. Ol syıaqylaryn Lıverpýldegi tsıklotronnyń (zarıadtalǵan bólshekterdi jyldamdatatyn qondyrǵy) qurylysyna baǵyttaǵan. Onyń kómegimen qaterli isik aýrýymen kúresý úshin neıtrondyq terapııa tehnologııasyn jasaýǵa árekettengen ", - dedi Sotheby's sarapshysy Selbı Kıffer.
Sonymen birge ol Chedvıktiń týystary shamamen 20 jyl buryn onyń medalin nýmızmatqa satqanyn aıtty. Qazir bul medaldi saýdaǵa sol kisi qoıǵan eken. Nagradany satyp alǵan adamnyń aty atalmady. Aýktsıondy uıymdastyrýshy bul lotty 200 myńnan 400 myń dollarǵa deıin satýdy kózdegen.
Nobel medaldary aýktsıonda óte sırek satylady. Ótken jyly sáýir aıynda DNK qurylymdaryn ashqandardyń biri, brıtandyq ǵalym Frensıs Krıktiń (1916-2004) medali Nıý-Iorktegi Heritage aýktsıon úıinde saýdaǵa qoıyldy. Onyń 1953 jyly ıe bolǵan nagradasy 2,27 mln. dollarǵa satyldy. Bul soma medaldiń óz qunynan ($500 myń) 4 ese asyp tústi.
