Neırondyq jeli Dýbaıdaǵy fýtýrıstik meıramhananyń aspazyna aınaldy

ASTANA.KAZINFORM - Dýbaı ortalyǵyndaǵy Woohoo meıramhanasynda retseptterdi «Aıman» esimdi jasandy ıntellekt aspazy daıyndaıdy. Onyń quny 1 mıllıon dollardan asady. «Aspaz Aıman» myńdaǵan retsep pen dám úılesimi týraly derekter boıynsha oqytylǵan. Bloomberg agenttigi ózin «gastronomııanyń bolashaǵy» retinde kórsetetin osy fýtýrıstik meıramhananyń tarıhy týraly habarlady, dep habarlaıdy Kazinform tilshisi.

Joba meıramhana ıesi Ahmet Oıtýn Chakırdiń jańa mázirmen jumys isteý barysynda ChatGPT kómegine júgingen eksperımentinen bastaldy.

Neırondyq jeli dámdeýish qosylǵan qoı etiniń retseptin usyndy.

- Bul keremet boldy. Biz birden sýretke túsirip, ony mázirge qoıdyq. Taǵam bestsellerge aınaldy, - dep eske alady meıramhana ıesi.

2025 jyldyń qyrkúıeginde Chakırdiń kompanııasy Gastronaut Hospitality jasandy ıntellektini negizgi tujyrymdamasy retinde paıdalanatyn Woohoo meıramhanasyn ashty.

Onda myńdaǵan retsept, dám úılesimderi, tamaq pen ónim derekteri boıynsha oqytylǵan úlken tildik model «Aspaz Aıman» ornalasqan. «Aspaz Aıman» - BAÁ-degi Vivid Studios tehnologııalyq kompanııasy ázirlegen mamandandyrylǵan UMAI AI modeli.

«Aspaz Aıman» taǵamdardy fızıkalyq túrde daıyndamaıdy; ol olardy jasaıdy. Model ıngredıentterdi taldaıdy, dástúrli emes dám úılesimderin jasaıdy jáne Woohoo aspazdary synaıtyn jańa taǵamdarǵa arnalǵan egjeı-tegjeıli retseptter jazady. «Aımannyń» sala kóshbasshylary qatysatyn ózindik podkasty da bar.

Buǵan deıin Dýbaı 2026 jyly óziniń alǵashqy áýe taksıin iske qosýdy josparlap otyrǵanyn habarlaǵan edik.