Neırondyq jeli arqyly jasalǵan óner týyndysynyń avtory kim bolady
ASTANA. KAZINFORM — QR Ádilet vıtse-mınıstri Botagóz Jaqselekova neırondyq jelilerdi paıdalaný kezinde avtorlyq quqyq kimge tıesili bolatynyn túsindirdi.
Búgin Senattyń jalpy otyrysynan keıingi baspasóz máslıhatynda qazir neırondyq jeliler óner salasynda jıi paıdalanylyp jatqany jaıynda suraq qoıyldy.
- Zańnamada avtorlyq quqyq sýbektisi retinde tek jeke adam qarastyrylǵan. Sondyqtan (neırondyq jelige) suraqty kim qoısa, sol adam avtor atanady, - dedi B. Jaqselekova tilshiler suraǵyna jaýap bere otyryp.
Osy oraıda ol jasandy ıntellekt belgilengen algorıtmderdi oryndaıtyn tetik retinde ǵana sanalatynyn aıtty.
- Atap aıtqanda, osy algorıtmdi belgilegen adam óner týyndysynyń avtory bolady, - dep naqtylady vıtse-mınıstr.
Budan buryn habarlanǵandaı, jaqynda túrki áleminiń jasandy ıntellekt etıkasyna arnalǵan alǵashqy jıyny ótti.