Neırohırýrgter kúni: Qazaqstanda kúrdeli otalardyń 80% el ishinde jasalady
ASTANA. KAZINFORM — 8 sáýirde adam aǵzasyndaǵy eń kúrdeli júıelerdiń biri – mı men júıke júıesine ota jasaıtyn neırohırýrgterdiń kásibı merekesi atalyp ótedi. Bul kún beker tańdalmaǵan: dál osy kúni qazirgi zamanǵy neırohırýrgııanyń negizin qalaǵan ǵalym Harvı Ýılıams Kýshıng dúnıege kelgen.
QR Prezıdenti is basqarmasy Medıtsınalyq ortalyǵy aýrýhanasynyń neırohırýrg-dárigeri Islambek Musabekovtiń aıtýynsha, bul salada jaýapkershilik asa joǵary. Ol Japonııanyń Nagoıa qalasynda taǵylymdamadan ótip, halyqaralyq tájirıbe jınaqtaǵan.
— Mı qurylymynyń kúrdeliligine baılanysty ota birneshe saǵatqa sozylady. Sebebi biz barynsha otanyń naýqas ómirine zııany az bolatyndaı jumys isteýge tyrysamyz. Ondaǵy árbir mıllımetr, árbir tilik úlken jaýapkershilik júkteıdi. Óz tájirıbemde eń uzaq ota 18 saǵatqa sozylǵan. Biz tańǵy saǵat 8-den tún ortasyna deıin ota jasap, naýqastyń jaǵdaıyn jiti baqylaýda ustadyq, — dedi dáriger Jibek Joly telearnasynyń «BÚGІN.Live» baǵdarlamasynda.
Búginde Qazaqstanda neırohırýrgııa salasy qarqyndy damyp keledi.
Densaýlyq saqtaý mınıstrliginiń málimetinshe, zamanaýı ortalyqtardyń ashylyp, jańa tehnologııalardyń engizilýi nátıjesinde buryn shetelde em alýǵa májbúr bolǵan naýqastardyń 80 paıyzy qazir elimizde emdeledi.
— Bizdiń aýrýhanamyzda ár bólimsheniń óziniń ota jasaıtyn zaly bolady. Al bizdiń neırohırýrgııa bóliminde bir emes, eki zal ornalasqan. Onda kem degende kúnine bir-bir naýqastan eseptegende aptasyna 10-15 kúrdeli ota jasalady, — deıdi I. Musabekov.
Sóz sońynda dáriger medıtsına salasyndaǵy jas mamandarǵa keńes berdi.
— Medıtsına tabandylyq pen sabyrdy qajet etedi. Adammen jumys istegendikten, adamnyń kóńilin tabý kerek. Kez kelgen em jyly sózden bastalady. Sodan keıin bilim alýdan jalyqpaı, jańa tilderdi meńgerý kerek. Ásirese qazir tsıfrlandyrý, jasandy ıntellekt keńinen engizilip, robot-hırýrgtar qoldanysqa ene bastady. Qazir elimizdegi aýrýhanalar sheteldik ortalyqtardan esh kem túspeıdi. MÁMS júıesi arqyly kez kelgen azamatqa hırýrgııa, terapııa baǵyty boıynsha tegin qyzmet kórsetiledi, — dedi ol.
Dáriger júıke júıesi aýrýlarynyń aldyn alý úshin salaýatty ómir saltyn ustanýǵa keńes beredi. Atap aıtqanda, ýaqytyly uıyqtaý, kóbirek qozǵalý jáne jetkilikti mólsherde sý ishý mańyzdy.
Aıta keteıik, Qazaqstanda ınsýlttan ólim-jitim kórsetkishi 25%-ǵa azaıǵan.
