Neırohırýrgııa ulttyq ortalyǵy keler jyldan gammanaıf apparatymen emdeýdi qolǵa alady
ASTANA. QazAqparat - Astanadaǵy «Neırohırýrgııa» ulttyq ortalyǵy keler jyly jańa gammanaıf apparatymen emdeýdi bastaýdy josparlaýda. Atalǵan qurylǵy operatsııanyń aldyn alýda óte mańyzdy qyzmet atqarady. Bul týraly «100 tabys tarıhy» atty ulttyq joba aıasynda jarııalanǵan «Neırohırýrgııa ulttyq ortalyǵynyń» basshysy Serik Aqsholaqov jaıyndaǵy áńgimede málim boldy, dep habarlaıdy QazAqparat.
Serik Aqsholaqov Aqtóbedegi medıtsınalyq ýnıversıtettiń travmatologııa bólimine oqýǵa túskende naǵashysy Jalmurat synyqshy sııaqty halyqtyń adamy bolýdy armandaǵan edi. Sol jyldarda neırohırýrgııa elimizde damymaǵan medıtsına salasynyń biri boldy. Birde Aqtóbege máskeýlik neırohırýrg A.N.Konovalov kelip, osy bir jańa baǵytqa qyzyǵýshylyǵyn oıatty. Serik Qýandyquly qazir Astanadaǵy «Neırohırýrgııa ulttyq ortalyǵynyń» basshysy, Halyqaralyq Eýrazııalyq neırohırýrgııa Akademııasynyń akademıgi, otandastarymyzǵa belgili top jarǵan dáriger-neırohırýrg. Osy ortalyq ashylǵanǵa deıin jas maman talaı asýlardan ótti. Jalyndy jastyq shaǵyn oqýǵa, bilim ıgerýge arnady. «Tek qana alǵa júrý, toqtamaý jáne qandaı jeńis pen jetistikke jetseń de mastanba, kidirme» degen ómirlik ustanymymen ol Máskeýge attandy. Stýdent kezinde ózin shaqyrǵan A.N.Konovalov janynda on bes jyl tájirıbe jınady, tanymal ǵalymnyń jetekshiligimen doktorlyq jumysyn qorǵady. Eń alǵashqy óziniń kúrdeli operatsııasyn da Máskeýde jasady.
Serik Qýandyqulyn tabysqa jetelegen jan dúnıesiniń bilimge degen qulshynysy. Ómirlik kásibi osy ortalyqpen tyǵyz baılanystaǵy dáriger aǵanyń áriptesteri men shákirtteri jańalyqqa qumar jandar. Onyń sońǵy jyldarda tárbıelegen 5 ǵylym doktory men 15 ǵylym kandıdaty qazir árqaısysy óz jolyn taýyp bul salanyń damýyna úles qosyp júr. Sonymen qatar sheteldik tanymal jýrnaldarda 100-ge jýyq ǵylymı maqalalary jarııalanǵan S.Aqsholaqov 13 ǵylymı monografııanyń avtory.
Qazaqstan medıtsınasynyń neırohırýrgııa salasyna ol alpystan astam operatsııa jasaýdyń jańa ádisterin engizip, ózi mı men omyrtqaǵa 5000-nan astam operatsııa jasady. Eń bastysy, otandyq operatsııalarǵa mıkroneırohırýrgııany, endoskopııalyq neırohırýrgııanyń negizderin engizdi jáne neıronavıgatsııany alǵash qoldanysqa engizip, epılepsııany jedel emdeýdi hırýrgııa tásilimen júzege asyrdy.
«Bizdiń ortalyqta kúrdeli operatsııalar jasalady. Shynynda, kóp adam aýrýyn jasyrǵysy keledi. Der kezinde aldyn ala emdelgenniń nátıjesi óte jaqsy bolatynyn eskermeıdi. Áli de bizdiń halyqtyń densaýlyqqa kózqarasy tómendeý. Al bizdiń ortalyq keler jyly jańadan kelgen gammanaıf apparatymen emdeýdi bastaýdy josparlaýda. Bul quralǵy operatsııanyń aldyn alýda óte mańyzdy qyzmet atqarady. Dertine daýa izdegen jannyń aýrýyn bastapqy deńgeıinde kúıdirip, joıyp jiberý arqyly emdeıdi. Arnaıy ortalyqta qazir gammonaıf apparatymen jumys jasaıtyn mamandar daıyndalýda», - dep dáriger Serik Aqsholaqov kókeıkesti oıymen bólisti.
