Neırohırýrg Serik Aqsholaqov aqtóbelik stýdentterge neni armandaıtynyn aıtty
AQTÓBE. QazAqparat - Búgin Ulttyq neırohırýrgııa ortalyǵynyń prezıdenti Serik Aqsholaqov pen akademık Jaqsylyq Dosqalıev Aqtóbedegi medıtsınalyq oqý oryndarynyń stýdentterimen kezdesti. Qos dáriger ózderiniń armandarymen bólisip, úzdik hırýrg bolýdyń qyr-syry týraly áńgime órbitti, dep habarlaıdy QazAqparat tilshisi.
Elbasy Nursultan Nazarbaev Aqtóbede medıtsınalyq klasterdi damytý tapsyrmasyn qoıdy. Soǵan sáıkes óńirdegi Aqtóbe balalar aýrýhanasy, oblystyq aýrýhana biriktilirip, úlken keshen quryldy. Al túrik ınvestorlary qalalyq jedel járdem beketiniń qurylysyn bastady. Ondaǵan reanımobıl ákelinip, qoldanysqa berildi. Sonymen qatar, oftalmologııalyq emhana qurylysy bastalyp, balalar stomatologııasy salynady. Bul jumystyń bir bóligi ǵana. Aqtóbe jerinde týyp-ósken dárigerler týǵan jerge kómek kórsetý maqsatynda birneshe iri jobalardy qolǵa aldy. Búgin «Darý» ońaltý ortalyǵynda Marat Ospanov atyndaǵy Batys Qazaqstan memlekettik medıtsınalyq ýnıversıteti men Aqtóbe medıtsınalyq kolledjiniń oqytýshylar quramy men stýdentter Ulttyq neırohırýrgııa ortalyǵynyń prezıdenti Serik Aqsholaqov, akademık Jaqsylyq Dosqalıevpen kezdesti. Stýdentter medıtsına salasynyń damýyna úles qosqan qos dárigerdiń armandaryn bildi.
«Aqtóbede kóp jumys istelip jatyr. Máselen, biz oqyp júrgende jaqsy tálim-tárbıe alatyn «Darý» ońaltý ortalyǵy sekildi medıtsınalyq mekeme bolmady. Bul eń joǵary tehnologııaly kómek kórsete alatyn ortalyq. Qazirgi kezde bul óte kerek. Hırýrgııa, terapııa salasynda da em nátıjesi ońaltýǵa tikeleı baılanysty bolady. Astanadaǵy emhanada ota jasalady. Jyl ótken saıyn damý bar»,- dedi Serik Aqsholaqov.
Neırohırýrg bolashaqqa úlken úmitpen qaraıdy. Eldiń densaýlyǵy, medıtsına salasy jas mamandardyń qolynda ekenin basa aıtty. «Nemerem neırohırýrg bolsa degen armanym bar. Ol talpynyp júr, oqıdy. Máselen, Jaqsylyq Dosqalıevtiń balasy neırohırýrg. Onyń armany oryndaldy. Balasy Aıdos Dosqalıev elimizge tanymal bilikti maman boldy»,- dedi Serik Aqsholaqov.
Jıyn kezinde akademık Jaqsylyq Dosqalıev te medıtsınaǵy qatysty oılarymen bólisti.
«Er balalar jas kezde tóbelesedi, qulap qalady, basynan soqqy alyp jatady. Sondaı bir kúnde balam Serik Aqsholaqovtyń aldyna bardy. Sol kúnnen soń hırýrg bolamyn dep júrgen bala bir sátte ózgerip, neırohırýrg bolamyn dedi. Kúndiz-túni neırohırýrgııany zerttedi, oqydy. Japonııada bilim aldy. Osy jerde men ýáde beremin. Serik Qýandyqulynyń nemeresiniń neırohırýrg bolýyna, armanyńyzǵa jetýge úles qosamyn dep aıtamyn»,- dedi akademık Jaqsylyq Dosqalıev.
Aıta keteıik, sońǵy jyldary elimizde neırohırýrg ataný úshin 4 jyl rezıdentýra mindetteldi. Kezdesý kezinde Ulttyq neırohırýrgııa ortalyǵynyń prezıdenti Serik Aqsholaqov jas mamandarǵa aǵylshyn tilin jetik meńgerýge keńes berdi.
