Neırohırýrg qyzdarǵa 40 jastan keıin turmys qurǵan durys — Myńjylqy Berdiqojaev
ASTANA. KAZINFORM — Neırohırýrgqa jar bolý — tek mahabbat emes, úlken tózim men jaýapkershilikti talap etetin tańdaý. Belgili neırohırýrg Myńjylqy Berdiqojaevtyń jubaıy Laýra Narıman osy ómirdiń qyr-syryn bólisti.
— Ekeýmiz de qyzylordalyqpyz. Biraq biz Reseıde tanystyq. Myńjylqy meni ózi taýyp aldy dep aıtýǵa bolady. Men Qazaqstanǵa demalysqa ketip qalsam, 6 ret qońyraý shalypty. Sosyn «bul mıgratsııalyq bólim be?» dep qaıta habarlastym. Sóıtsem, «qyzylordalyqpyn, sen de qyzylordalyq ekensiń, kezdeseıik, tanysaıyq» dedi. Sankt-Peterbýrg qalasynda oqıtyn qyzylordalyq jalǵyz stýdent qyz men edim. Men de «jaraıdy» dep kelisip, kezdesip, tanystym. 1,5 jyl dos boldyq. Biraq úshinshi kezdesýde maǵan «kúıeýge shyqshy» dep aıtty. Men «joq, aldymen dıplomymyzdy alyp, elge oralaıyq, sodan keıin baryp úıleneıik» dedim, — deıdi ol Jibek Joly arnasynyń «Búgin LIVE» baǵdarlamasyna bergen suhbatynda.
Óz kezeginde Myńjylqy Berdiqojaev ta bul oıdy qýattaıdy.
— Adam ózine tanys dúnıeni izdeıdi ǵoı. Qyzylordada ortaq tanystarymyz kóp eken. Qyzylordanyń áńgimesi janǵa jaıly. Qyzylordanyń qyzy, shyqqan jeri — bári jaqsy. Men ol kezde medıtsınany 9-shy jyl oqyp jattym. Laýra magıstratýranyń 1-kýrs stýdenti edi. Tamasha qyzdy kezdestirgennen keıin «úıleneıik» dep aıttym. Biraq qazaq bolǵandyqtan toı, qudalyq bolýy kerek. Laýra «joq, bolmaıdy, bárin retimen isteımiz» degen soń, 1,5 jyldan keıin elge qaıtyp keldik, — deıdi Myńjylqy Berdiqojaev.
Búginde bul otbasynyń ómirinde medıtsına salasynyń ózindik orny bar. Laýra Narıman bul turǵyda jaýapkershiliktiń joǵary ekenin aıtady.
— Ol Sankt-Peterbýrg qalasynda oqyp júrgende-aq kezekshilikterge shyǵatyn, úıde bolmaıtyn. Sondyqtan o bastan kimge kúıeýge shyǵyp jatqanymdy jaqsy bildim. Árbir áıelge hırýrgke turmysqa shyqsań, kóp nárseni bilýiń kerek der edim. Keıde tún ishinde alyp ketedi. Jyldyń teń jartysy elde bolmaıdy: shetelde, konferentsııalarda, operatsııalarda júredi. Mundaı kezde áıel adamǵa kóp aýyrtpashylyq túsedi. Óıtkeni úıdiń máseleleri, bala-shaǵa bar. Sonda da telefon arqyly beıneqońyraý shalyp, sóılesip turamyz. Mańyzdy dúnıelerdi kúıeýim alysta bolǵanda qońyraý arqyly aqyldasamyz. Biraq «qınalyp, qashan kúıeýim kelip kómektesedi eken» degen oı joq. Turyp, bárin ózim isteı beremin, — deıdi neırohırýrgtyń jary.
Al Myńjylqy Berdiqojaev otbasy túsinistiginiń mańyzyn atap ótti.
— Árıne, meniń neırohırýrg bolǵanym bir jaǵynan qorqytatyn faktor bolýy múmkin. Óıtkeni psıhologter «dárigerlerden qoryq» dep aıtyp jatady ǵoı. Laýranyń ápkesi — dáriger-nefrolog. Ol dárigerlerdiń qandaı bolatynyn kishkentaıynan kórgen. Sondyqtan meniń neırohırýrg bolǵanym ony qorqytqan joq. Úılengennen keıin de meniń jumysta, kezekshilikte bolýym múmkin ekenin túsinistikpen qabyldady, — deıdi stýdııa qonaǵy.
Sonymen qatar, ol jastarǵa, ásirese qyz balalarǵa kásibı baǵytta keńes berdi.
— Qazir qyz balalar neırohırýrgııany tańdap jatyr. Ózim de neırohırýrg bolyp, operatsııa jasap júrgen birneshe qyzdy tanımyn. Árıne, olar aldymen kásibin jolǵa qoıyp, aıaqqa nyq turýy kerek. Odan keıin operatsııany kúndelikti daǵdyǵa aınaldyrý qajet. Eger erte kúıeýge shyǵyp, balaly bolyp, dekrettik demalysqa ketse, qıyn bolady. Sol úshin, múmkin bolsa, mansapty qalyptastyryp, 40 jasqa jaqyndaǵan kezde turmysqa shyqqany durys degen aǵalyq keńesim, — deıdi dáriger.
Myńjylqy Berdiqojaevtyń aıtýynsha, jumysynyń basym bóligi shetelde ótedi.
— Men ýaqytymdy januıama, bala-shaǵama bólgim keledi. Balalar keıde demalysty bizben birge ótkizgisi keledi. Biraq meniń jumysym Astanamen baılanysty emes. Jumysymnyń basym bóligi shetelde ótedi. Onyń bári osy januıany aıaqqa turǵyzýǵa, asyraýǵa baǵyttalǵan, — deıdi ol.
Eske sala keteıik, 8 sáýirde adam aǵzasyndaǵy eń kúrdeli júıelerdiń biri — mı men júıke júıesine ota jasaıtyn neırohırýrgterdiń kásibı merekesi ótken edi.
