Neırochıpteri bar kógershinder: qustar qalaı ushatyn dronǵa aınalady

ASTANA.KAZINFORM – Reseılik Neiry startapy kógershinderdi alys qashyqtyqtaǵy barlaý men baqylaýǵa arnalǵan kameralarmen jabdyqtalǵan shaǵyn drondarǵa aınaldyrýdy josparlap otyr, dep habarlaıdy Kazinform BILD basylymyna silteme jasap.

Kompanııa alǵashqy synaq reısterin jasap úlgerdi. Qustardyń mıyna neırochıpter ımplantatsııalanady, olar ushý joldaryn kórsetedi. Adam kógershindi baǵyttaý úshin jaı ǵana júıke ımpýlstaryn jiberedi. Chıp kabel arqyly qustyń arqasyndaǵy shaǵyn rıýkzakqa qosylǵan, onda kontroller, GPS jáne kún batareıasy ornalasqan. Qustyń keýdesine shaǵyn kamera bekitilgen. 

Neiry-diń negizin qalaýshy Aleksandr Panovtyń aıtýynsha, mundaı kógershinder «mehanıkalyq drondar aýqymy, salmaǵy nemese basqa parametrleri boıynsha shektelgen» qoldanbalarǵa jaramdy. Olardy ınfraqurylymdy qadaǵalaýda, izdeý-qutqarý jumystarynda, jetý qıyn aımaqtarda, tipti tyńshylyq úshin de paıdalaný josparlanǵan. 

Kógershinder 400 shaqyrymǵa deıin usha alady, al kún batareıasy ondaǵy batareıany aýystyrý qajettiligin joıady. 

Sondaı-aq Aleksandr Panov bolashaqta júk tasymaldaýshy retinde basqa qustardy da qoldanýǵa bolatynyn túsindirdi. Atap aıtqanda, aýyr júkter úshin qarǵa, jaǵalaýdy baqylaý úshin shaǵala jáne teńizde baqylaý júrgizý úshin albatrostar taptyrmas quralǵa aınalmaq. 

Kompanııanyń ınvestorlary arasynda Ulttyq tehnologııalyq bastama bar, sonymen qatar startap Máskeý memlekettik ýnıversıtetiniń jasandy ıntellekt ınstıtýtymen yntymaqtasady. 

Eske sala keteıik, buǵan deıin Qytaıdyń gıbrıdti júk tasıtyn dron ushaǵy alǵash ret áýege kóterilgenin habarlaǵanbyz.