Neımar óz quramasynan 4 oıynǵa shettetildi
ASTANA. QazAqparat - Amerıka kýbogynyń tártiptik komıteti brazılııalyq fýtbolshy Neımardy ábes qylyǵy úshin óz quramasynyń 4 oıynynan shettetti, dep jazady Bı-bı-sı.
Osylaısha ol Amerıka kýbogynyń sońǵy 4 kezdesýine qatyspaıtyn boldy. Budan bólek «Barselona» shabýylshysyna 10 myń dollar aıyppul salyndy.
Ótken sársenbi kúni Neımar Kolýmbııaǵa qarsy oıyn kezinde qarsylas qorǵaýshysy Jeıson Mýrılony baspen súzgeni úshin qyzyl qaǵaz alyp, alańnan qýylǵan. Alaıda fýtbolshy olaı istemegenin, kerisinshe ony ıtergenin aıtyp aqtalǵan. Biraq bul shyǵarylǵan sheshimge esh áser etken joq.
