Neımar Olımpıada oıyndaryna qatyspaýy múmkin
ASTANA. QazAqparat - Katalondyq «Barselonanyń» áıgili brazılııalyq shabýylshysy Neımar óz elinde ótetin Olımpıada oıyndaryna qatyspaýy múmkin. Bul týraly UOL Esporte basylymy habarlady.
«Blaýgrana» brazılııalyq fýtbolshynyń Olımpıadaǵa qatysýyna úzildi-kesildi qarsy bolýda. Rıodaǵy doda fýtbolshyny jańa maýsym aldynda sharshatatynyn alǵa tartýda. Al Neımar bolsa Olımpıada chempıony atanýdy armandaıtynyn osyǵan deıin aıtqan bolatyn.
Aıta keteıik, Olımpıada oıyndaryndaǵy fýtbol erejesine sáıkes, qurama sapyna 23 jastan asqan úsh oıynshyny qosýǵa bolady. Osyǵan oraı Brazılııa ulttyq quramasynyń bas jattyqtyrýshysy Dýnga olımpıadalyq quramǵa «Barselonadan» Neımardy, «Interden» qorǵaýshy Mırandany, qaqpaǵa «Internasonal» oıynshysy Alıssondy shaqyrǵan-dy.
Neımar Brazılııa olımpıadalyq quramasymen 2012 jyly Londonda ótken Olımpıada oıyndaryna qatysqan. Fınalǵa deıin jetken brazılııalyqtar sheshýshi oıynda Meksıka quramasyna ese jiberip alǵan edi, dep jazady massaget.kz.
