Neımar: «Dýbl avtory atanǵanyma qýanyshtymyn»
ASTANA. QazAqparat - Álem chempıonatynyń alǵashqy matchy - Brazılııa-Horvatııa (3:1) kezdesýinde dýbl avtory atanǵan brazılııalyq shabýylshy Neımar oıynnyń qortyndy esebine jáne óziniń eki golyna qanaǵattanatyndyǵyn jetkizdi.
"Bul ashylý matchtarynyń eń keremeti boldy", - dep keltiredi ESPN Neımardyń sózin. - Biz jeńiske qatty umtyldyq. Men eki goldyń avtory atanǵanyma qýanyshtymyn. Eki gol da, sizder baıqasańyzdar, erekshe soǵyldy. Birinshisinde men dop qorǵaýshynyń eki aıaǵynyń ortasynan ótip ketse eken dep edim, biraq soqqy tym álsiz edi. Degenmen, bastysy gol boldy. Men penaltı soǵar aldynda kóńilimdegi alańdaýshylyqty qalaı basa bildim? Barlyǵy tájirıbege baılanysty. Rasymen, qaqpashy meni azdap shoshytty, biraq dop qaqpaǵa darydy.
Aıta keteıik, Fýtboldan Álem chempıonatynyń alǵashqy matchynda Brazılııa qurama komandasy Horvatııany 3:1 esebimen tize búktirdi. Match San-Paýlý qalasynda "Arena Korıntıans" stadıonynda ótti. Búgin chempıonattyń úsh matchy bolady. Kamerýn Meksıkamen, Ispanııa Nıderlandymen, Chılı Aýstralııamen kezdesedi.
