NewBorn-túsirilim: Sábılerdi sýretke túsirý óneri qalaı damyp keledi?

NewBorn - jańa týǵan nárestelerdi fotoǵa túsirý óneri. Bul baǵyt Qazaqstanda áli damý ústinde. Jańa ǵasyr basynda NewBorn-fotoǵa qarsylyq tanytqandar kóp boldy.  Muny halyqtyń dinı kózqarastary jáne dilimen baılanystyrdy.  Al, shetelde mundaı fotosessııa jasaý úırenshikti jumysqa aınalǵan. Qazir elimizde túsirilimniń bul túrin qoldaýshylar sany artqan. Osy baǵytta jumys isteıtin fotosýretshiler de qatarǵa qosyldy.

- NewBorn-foto baǵytyna qalaı keldińiz?

- Men birinshi qyzymdy 2014 jyly dúnıege ákeldim. Barlyq jas otbasylar sııaqty men de óz sábıimniń qylyqtaryn taspaǵa túsirip alýdy unatatynmyn. Keıin munym qyzyǵýshylyqqa aınalyp, hobbıǵa ulasty. Mine, 2015 jyldan bastap bul fotoónermen turaqty aınalysyp kelemin. Fotosýretshilerdiń arnaıy kýrsynan óttim. Biraz ýaqyttan soń fotoárleýshi synybyn aıaqtadym. Sol jyly TMD elderine tanymal newborn-fotosýretshiden dáris aldym. Osydan keıin óz ómirimdi NewBorn-foto baǵytyna arnadym desem qatelespeımin.

- Alǵashqy fototúsirilim qalaı ótti?

- Fototúsirilimdi endi bastap júrgender úshin birinshi synaqtyń qobaljýly bolatyny anyq. Sábı ózin qalaı ustaıdy? Anasy qalaı qabyldaıdy? Mine, jumystyń sapaly nátıjesi osylarǵa baılanysty. Áýeli óz týystarymdy túsirip kórdim. Meniń birinshi keıipkerim ózimniń jıenim boldy. Túsirilim sátti ótti dep oılaımyn.

- Sábılermen jumys isteý qanshalyqty qıyn?

- Menińshe, NewBorn - fototúsirilimniń eń qıyn túri. Birinshiden, sábıdiń kóńilin ózińe qaratýyń kerek. Onyń qaýipsizdigi únemi nazarda bolady. Ekinshiden, seniń jumysyńdy sábıdiń ata-anasy qadaǵalap turady. Sondyqtan fotosýretshi sábıdiń ǵana emes, ana júregine de jol taba bilýi tıis.  Kóbi menen bul baǵytty nelikten tańdaǵynymdy suraıdy. Fotografııa - bul óner, al sábılerdi fotoǵa túsirý - ónerdiń bıik shyńy. Sebebi, mundaı fototúsirilim bir-aq ret jasalyp, máńgilik estelik retinde saqtalady.

- Kishkentaı modelderdi qaı jasynan bastap fotoǵa túsirgen durys?

- Mundaı túsirilim sábıge eki apta tolǵannan bastalady. Óıtkeni, bul aralyqta náresteniń kindigi ajyraıdy. Osydan soń balanyń ár túrli qalyptaǵy sátterin obektıvpen «ustap alýǵa» bolady. Áýesqoı fotodan góri, kórkem fototúsirilim jasaýǵa múmkindik alasyń.  

- NewBorn-fotoǵa daıyndalý úshin jas ata-analarǵa qandaı keńes beresiz?

-  Jalpy, qostanaılyq qaýym mundaı fototúsirilimdi áli tolyqtaı qabyldaǵan joq. Kóbisi sábılerine 40 kún tolmaǵansha kásibı fotoǵa túsirtpeıdi. Biraq,  sońǵy jyldary NewBorn-foto baǵytyn qoldaýshylar kóbeıip keledi. Fotosýretshi áriptesterimizben túsirilim úshin birge turaqty baǵany belgiledik. Qostanaıda 5000 teńgege NewBorn-foto jasaýǵa bolady. Keı ata-analardyń zamanaýı kózqarastary qýantady. Balanyń kishkentaı kezindegi qylyqtaryn este qaldyrý úshin de NewBorn-foto baǵytyn tańdadyq. Bizdi qoldaıtyndarǵa alǵysymyz sheksiz.