«New Vision: Bıznes kúshi»: Almatyǵa álemdik kásipkerler jınaldy
ALMATY. KAZINFORM – Almaty qalasynda alǵash ret «New Vision: Bıznes kúshi» jahandyq bıznes-forýmy ótip jatyr. Іs-shara aıasynda elimizdiń ońtústik astanasyna otandyq jáne sheteldik bıznes-kóshbasshylary, kórnekti saıası qaıratkerler jınaldy.
Forým barysynda jasandy ıntellekt dáýirindegi jahandyq bıznes pen naryqtaǵy ózgerister jáne ózge de taqyryptar qozǵalady. Іs-sharaǵa ınternet novator Djeff Hoffman, Virgin Group negizin qalaýshysy Rıchard Brenson, jetistik psıhologııasy salasyndaǵy álemdik sarapshy Braıan Treısı jáne basqa da bıznesmender, ınvestorlar, tehnologııalyq kóshbasshylar qatysyp jatyr.
«Búgingi kúni jahandaný úrdisi óte jyldam júrip jatyr. Naryq ta jyldam ózgerýde. Buryn bir salada kóshbasshyǵa aınalý úshin kóp jyl qajet edi. Biraq qazir bir kompanııa 10 jyl boıy júrip ótken joldy 2-3 aıda ótip, olardy ozyp ketýge bolady. Biz az ýaqytta ózgelerdiń naryǵyn jaýlap alyp, odan tez óz naryǵymyzdy joǵaltyp ala alamyz», - dedi Freedom Holding Corp. bas atqarýshy dırektory Tımýr Týrlov.
Sondaı-aq qazaqstandyq kásipker búgingi kúni bilikti mamandarǵa suranys joǵary ekenin atap ótti. Onyń aıtýynsha, jahandaný dáýirinde bilim men jańa tehnologııalardy úırenýge ınvestıtsııa jasaý qajet.
«Qazirgi ýaqytta joǵary bilikti mamandar jetispeıdi. Talant – búginginiń basty kapıtaly. Qazirgi ýaqytta memleket baı bolýy úshin bilim joǵary deńgeıde bolýy qajet. Biliktiligi joq jumysshylarǵa degen suranys azaıyp keledi. Eger aılyǵy az, suranysy joq jumysta júrseńiz – onda sizdiń jumysyńyzǵa qaýip tónip tur. Kompanııalar qazirgi ýaqytta bilikti mamandarǵa ınvestıtsııa quıýǵa daıyn. Eger qazir 100 bilikti mamandy jaldaý múmkindik bolsa, onda aqshaǵa qaramaı olardy jumysqa alar edik. Óıtkeni olar odan da kóp tabys ákeledi. Sondyqtan óz bolashaǵyńyzǵa, óz bilimińizge ınvestıtsııa jasańyz. Jasandy ıntellekt bizdi jeńe almaıdy. Biraq JI-di qoldanǵan adamdar, ony qoldanbaǵandardy jeńedi. Sondyqtan jańa tehnologııalardy úırenýge ınvestıtsııa jasańyzdar», - dedi Tımýr Týrlov.
