«New Music Generation 2020»: Kompozıtorlar konkýrsynyń 2-kúni qalaı ótýde
NUR-SULTAN. QazAqparat - Elordada 16-21 qarasha aralyǵynda «New Music Generation 2020» ІІ Halyqaralyq kompozıtorlar konkýrsy ótip jatyr, dep habarlaıdy QazAqparat tilshisi.
«Búgin, 17 qarashada konkýrstyń ekinshi kúninde úsh atalymda, úsh jas sanaty boıynsha partıtýralardy qaraý ótip jatyr. Keshke qaraı qorytyndy jıyp ótip, onda búgingi partıtýralardy qaraý qorytyndysy talqylanady. Sodan keıin qazylar alqasynyń músheleri óz kesimderin shyǵaryp, ol hattalady. Konkýrs nátıjelerin juma kúni jarııa ete alamyz. Erteń Óner ýnıversıtetiniń Organ zalynda ótetin konkýrs aıasyndaǵy kontsertke daıyndalamyz», - dedi Qazaq ulttyq óner ýnıversıteti halyqaralyq yntymaqtastyq jáne shyǵarmashylyq qyzmetiniń jetekshisi Erkebulan Rahymov.
Onyń naqtylaýynsha, qaraý jáne tyńdaý qarashanyń 16-sy men 17-si aralyǵynda ótip jatyr. Konkýrsqa qatysýshy kompozıtorlar óz týyndylaryn jazyp, ony uıymdastyrý komıtetiniń elektrondy mekenjaıyna jiberedi. Nátıjesi 20 qarasha jarııalanady.
Konkýrs kelesi nomınatsııalarda ótkiziledi:
«Sımfonııalyq týyndy» (solıstpen nemese solıstermen, onyń ishinde vokalıstermen nemese vokalıstersiz);
«Kameralyq shyǵarma» (solo aspaptan bastap solısterdiń úlken ansambline deıin);
«Vokaldyq shyǵarma» (ánshilerdiń sany shektelmegen, aspaptyq súıemeldeýmen nemese súıemeldeýsiz).
Konkýrsqa úsh jas toby boıynsha kompozıtorlar qatysady:
Birinshi top - 15 jasqa deıin;
ekinshi top – 15 jastan 25 jasqa deıin;
úshinshi top – 25 jastan 35 jasqa deıin.
Konkýrsqa álemniń 22 elinen (Qazaqstan, Frantsııa, Germanııa, Italııa, Ispanııa, Avstrııa, Belgııa, Chehııa, Qytaı, Argentına, Chılı, Fılıppın, Rýmynııa, Gretsııa, Serbııa, Jańa Zelandııa, Fınlıandııa, Reseı Federatsııasy, Ýkraına, Belarýs, Moldova, Lıtva), 160-tan astam partıtýra, 98 konkýrsant usynyldy.
Qazylar alqasy músheleriniń partıtýralardy qaraýy alǵash ret onlaın ótkizilýde.
