«Nevada-Semeı» qozǵalysynyń «mırasqory» Astanada halyqaralyq kongress ótkizdi
ASTANA. QazAqparat - Búgin Astanada «Qazirgi ekologııalyq ahýal: álemdik úrdister men ulttyq erekshelikter» taqyrybynda halyqaralyq ekologııalyq kongress ótti.
Sharanyń uıymdastyrýshysy - «Baıtaq Bolashaq» ekologııalyq alıansy, dep habarlaıdy QazAqparat tilshisi.
Kongreske qatysýshylar klımattyń ózgerýi máselesinen bastap aýyl sharýashylyǵynda pestıtsıdter men gerbıtsıdterdi qoldanýǵa deıingi san alýan ekologııalyq máselelerdi talqyǵa saldy. Sondaı-aq Semeı polıgonynyń zardaptaryn taǵy bir márte eske alyp, onyń mýtatsııalyq áseri áli de tolastamaı jatqanyn jetkizdi. Al, eń bastysy, halyqtyń ekologııalyq mádenıetin qalyptastyrý qajettigine basa nazar aýdardy. Ásirese, otbasydan bastap balalardyń ekologııalyq sana-sezimin qalyptastyrǵan asa mańyzdy. Sebeb ýaqyt óte kele, ol halyqtyń ekologııalyq mádenıetine negiz bolady.
«Búgingi kongress - ol qazirgi zamannyń talaby. Óıtkeni álemdik aýqymda qaraıtyn bolsaq, ekologııalyq máseleler kúnnen-kúnge kóbeıip keledi. Birinshiden, klımat ózgerip jatyr. Ekinshiden, adamdardyń densaýlyǵy nasharlap keledi. Sonyń barlyǵy tabıǵatty qorǵaýǵa tikeleı baılanysty. Osyǵan oraı biz Qazaqstandaǵy ekolog ǵalymdardyń basyn qosyp, osy saladaǵy ózekti degen máselelerin talqylap otyrmyz. Negizgi maqsatymyz - naqty problemalardy anyqtap, sony sheshý joldaryn usyný. Sosyn álemdik jaǵdaıda qandaı ekologııalyq ahýaldar bar? Solarmen qalaı kúresip jatyr? Osy úderiske biz qalaı qosyla alamyz? Olarmen birge qalaı jumys isteımiz? Mine, sol úshin biz búgingi kongresti uıymdastyrdyq», - deıdi «Baıtaq Bolashaq» ekologııalyq alıansynyń prezıdenti Azamathan Ámirtaev.
Onyń aıtýynsha, alıans búgingi kongress arqyly ekologııa máselesine taǵy bir márte basa nazar aýdaryp, osy saladaǵy ǵylymı-zertteý ınstıtýttarynyń jumysyna jańasha serpin berýdi kózdeıdi. Sondaı-aq uıym basshysy kelesi 2018 jyldy ekologııa jyly dep jarııalaýdy usyndy.
Aıta keteıik, kongreske qatysýshylar «Baıtaq Bolashaq» ekologııalyq alıansy burynǵy «Nevada-Semeı» qozǵalysynyń isin jalǵastyryp, ekologııa máselelerin jerine jetkize alady» degen nıetin de jetkizdi. Al sharany ashqan «Nevada-Semeı» qozǵalysynyń jetekshisi, qoǵam qaıratkeri Oljas Súleımenov qazaq halqy úshin ekologııalyq problemalardyń zardabyn qarapaıym ári urymtal bir mysalmen kórsetti. Sondaı-aq, jazýshy árbir qazaqstandyqty bir tal aǵash otyrǵyzyp, ekologııaǵa óz úlesin qosýǵa úndedi.
