«Neva ekspresiniń» jolaýshylaryn qutqarǵan keıýanaǵa jańa úı salyp berdi
ASTANA. Jeltoqsannyń 30-y. QazAqparat - «RJDStroı» kompanııasy qarashanyń 29-ynda apatqa ushyraǵan «Neva ekspresi» poıyzynyń zardap shekken jolaýshylaryna kómektesken zeınetker Elena Golýbevaǵa búgin, sársenbi kúni jańa úıdiń kiltin tabys etedi,
dep habarlaıdy «RIA «Novostı» agenttigi. Injenerlik kommýnıkatsııalarǵa qosylyp, gaz tartylǵan úıdiń jıhazdary da, ydys-aıaqtary da jańa bolady.
Úıiniń dál janynda «Neva ekspresi» poıyzy apatqa ushyraǵan Tver oblysy Bologoe aýdanynyń turǵyny 78 jastaǵy Elena Golýbeva zardap shekkenderge kómekke umtylǵan birinshi adam bolatyn. Keıýana jaralylardy úıine jaıǵastyryp, olarǵa qolynan kelgenshe kómek kórsetken.
Reseı temir jolynyń basshylyǵy zeınetkerge laıyqty syılyq jasaý týraly sheshim qabyldap, «RJD» bastysy Vladımır Akýnın temirjolda 40 jyl boıy eńbek etken keıýanany «Qurmetti temirjolshy» belgisimen marapattady. Qarııa sondaı-aq, zeınetqasyna qosa, kompanııadan ómir boıyna qosymsha járdemaqy alatyn boldy.
Apat kezinde relsten shyǵyp ketken vagonnyń jerge qatty soǵylǵany sonsha, zeınetker turǵan úı qatty zardap shekken. RF Premer-mınıstri Vladımır Pýtın Golýbevaǵa jańa baspana berý týraly ókim bergennen keıin, «RJD» kompanııasy zeınetker qalaǵan jerge jańa úı salyp berý týraly sheshim qabyldady. Jáne Elena Mıhaılovnanyń týystary turatyn Lykoshıno derevnıasynda bir aıǵa jeter-jetpes ýaqyttyń ishinde jańa úı salyndy. Búgin, jeltoqsannyń 30-y kúni jańa úıdiń kilti keıýanaǵa tabys etiledi.
Máskeý-Sankt-Peterbor baǵytyndaǵy №166 «Neva ekspresi» júrdek poıyzy qarashanyń 27-si kúni keshke Novgorod jáne Tver oblystarynyń shekarasynda apatqa ushyraǵan bolatyn. Quqyq qorǵaý organdarynyń negizgi dolbary boıynsha, apatqa lańkestik áreket sebep bolǵan. Oqıǵa saldarynan 26 adam qaza taýyp, 90-nan astam adam zardap shekken edi.
