Netflix Warner Bros-ty 82,7 mlrd dollarǵa satyp alady

ASTANA. KAZINFORM — Netflix kompanııasy Warner Bros-ty 82,7 mlrd dollarǵa satyp alatynyn jarııalady. Osylaısha eń iri strımıng servısi «Kasablanka», «Garrı Potter» franshızasy sııaqty fılmderdi túsirgen áıgili stýdııamen birigedi, dep habarlaıdy Kazinform tilshisi CBS News-ke silteme jasap.

Netflix Warner Bros. kompanııasynyń ár aktsııasyn 27,75 dollardan satyp almaq. Osy baǵamen barlyq aktsııalardy satyp alǵandaǵy jalpy soma — 72 mlrd dollar. Onyń jalpy naryqtyq quny 82,7 mlrd dollar bolyp esepteledi.

Kelisim Warner Bros. Discovery 2026 jyldyń úshinshi toqsanynda ózderiniń Discovery Global telejeliler bólimin bólek shyǵaryp alǵan soń, 12–18 aı ishinde aıaqtalady dep kútilip otyr.

Warner Bros. stýdııalaryn satyp alý Netflix úshin mańyzdy strategııalyk qadam bolmaq. Usynylyp otyrǵan kelisim aıasynda strımıng alpaýyty Warner Bros. stýdııasynyń fılm shyǵarý jónindegi barlyq sharttyq mindettemelerin oryndaýǵa mindettendi.

Investorlarmen kezdesýde Netflix basshylary bul kelisim kompanııaǵa kóbirek jazylýshy tartýǵa ári aktsıonerlerge paıda ákelýge kómektesetinin aıtty.

— Biz jazylýshylar sanyn arttyramyz jáne olardy ustap qalamyz dep úmittenemiz, sondaı-aq tabys pen operatsııalyq kiristi kóbeıtemiz. Bul bizdiń bıznestiń keleshek onjyldyqtardaǵy damýyn jedeldetedi dep oılaımyz, — dedi kompanııanyń teń quryltaıshysy Greg Pıters.

Analıtıkterdiń pikirinshe, Netflix Warner Bros-tyń keń aýqymdy strımıngtik jáne fılmdik kontentiniń qosylýynan aıtarlyqtaı paıda kórmek.

Jazda mámile týraly qaýesetter taraǵannan beri baǵasy eki eseden asa ósken Warner Bros. aktsııalary AQSh-ta saýda bastalar aldynda aıtarlyqtaı ózgergen joq. Al Netflix aktsııalary 2,85 dollarǵa nemese 2,8%-ǵa tómendep, 100,50 dollardy qurady.

Buǵan deıin HBO, CNN jáne ózge strımıng servısteri men stýdııalardyń ıesi Warner Bros. Discovery ózin satýǵa shyǵaratyny habarlanǵan bolatyn. Kompanııa aktıvterine Comcast jáne Paramount Global qyzyǵýshylyq tanytqan edi.