Netanıahý Tramptyń Gaza týraly josparyn qabyldamady
ASTANA. KAZINFORM – Izraıl AQSh basqaratyn «Beıbitshilik keńesi» usynǵan Gaza sektoryndaǵy beıbit kelisimge qatysty 15 pýnktten turatyn jol kartasyn qabyldamady. Bul týraly jeksenbide Izraıl premer-mınıstri Bınıamın Netanıahý málimdedi, dep habarlaıdy Sınhýa.
Bul málimdeme Izraıldiń bul jospardan alǵashqy resmı jáne tikeleı bas tartýy boldy.
Netanıahý Mınıstrler Kabınetiniń apta saıynǵy otyrysynda atap ótkendeı, el sheneýnikteriniń burynǵy baǵalaýy boıynsha Gaza sektorynyń shamamen 70 paıyzyn baqylaıtyn Izraıl áskerleri «qaýipterdiń aldyn alý» úshin anklavta áskerı operatsııalardy jalǵastyrady.
Euronews habarlaýynsha, Netanıahý sonymen qatar Gazada da, Iordanııanyń batys jaǵalaýynda da Palestına memleketiniń qurylýyna eshqashan kelispeıtinin atap ótti.
- Izraıl 15 tarmaqtan turatyn qujatty qabyldamaıdy. Izraıldiń qorǵanys armııasy HAMAS qarýsyzdandyrylmaıynsha sheginbeıdi. Men HAMAS qarýsyzdandyrylýy kerek degende, aýyr nemese jeńil qarý-jaraq týraly emes, barlyq qarý-jaraq týraly aıtyp otyrmyn. Al biz oıdan shyǵarylǵan emes, naqty qarýsyzdaný týraly aıtyp otyrmyz, - dedi Netanıahý.
Onyń aıtýynsha, Izraıl Amerıka Qurama Shtattarymen máseleni talqylap jatyr.
- Olardyń óz ıdeıalary bar. Keıbireýi bizge qolaıly, keıbireýleri joq jáne biz mundaı máseleler boıynsha óz ustanymymyzdy qalaı qorǵaý kerektigin bilemiz. Biz muny buryn dáleldedik jáne qazir de dáleldep jatyrmyz, - dedi Izraıl premer-mınıstri.
Jeksenbide HAMAS Vashıngtondy Bınıamın Netanıahýdyń málimdemesinen keıin Izraılge qysym jasaýǵa shaqyrdy. Bul týraly AQSh pen Eýropalyq Odaq terrorıstik dep tanyǵan qozǵalys ókiliniń Frans-press (AFP) agenttigine bergen málimdemesinde aıtylǵan.
- Biz deldaldardyń jáne amerıkalyq kepilgerdiń Netanıahý men onyń úkimetine jol kartasyn ustanýǵa jáne ishki saıası nemese saılaý sebepteri boıynsha protseske kedergi keltirmeýge qysym jasaýyn kútemiz, - delingen málimdemede.
Senbi kúni ıslamshyl top AQSh qoldaǵan beıbitshilik josparyn júzege asyrýǵa daıyn ekenin atap ótip, Izraılge qysymdy kúsheıtýge shaqyrdy.
Shilde aıynyń sońynda, Bınıamın Netanıahýdyń Aq úıge saparynan keıin AQSh prezıdenti Donald Tramp óziniń Beıbitshilik keńesi Gaza boıynsha «tarıhı kelisimge» qol jetkizgenin, onda HAMAS pen basqa da barlyq qarýly toptardyń qarýsyzdanýy, Izraıl áskerleriniń shyǵarylýy jáne anklavtaǵy bılikti tehnıkalyq úkimetke berý kózdelgenin málimdegen bolatyn.
Izraıl Gaza sektorynda beıbit turǵyndarǵa shabýyldy kúsheıtkenin jazǵan edik.
