Netanıahý Tramppen kezdesýinde baj salyǵyn jeńildetýge tyryspaq
ASTANA. KAZINFORM — Izraıl premer-mınıstri Bınıamın Netanıahý AQSh prezıdenti Donald Tramppen kezdesýinde baj salyǵyn jeńildetýge kúsh salmaq. Sonymen qatar kún tártibinde ızraıldik tutqyndar, tarıfter men Gaza sektoryndaǵy soǵys bolady, dep habarlaıdy Kazinform agenttiginiń menshikti tilshisi.
Jeksenbi kúni Izraıl premer-mınıstri Bınıamın Netanıahý AQSh prezıdenti Donald Tramp Vashıngtondaǵy kezdesý qorytyndysynan keıin Izraılge qarsy salynatyn baj salyǵyn jeńildetedi dep úmittenetinin aıtty.
Tramp jarııa etken keń aýqymdy jańa tarıf saıasaty aıasynda ızraıldik taýarlarǵa AQSh 17 paıyz baj salyǵyn salmaq.
Qurama Shtattar Izraıldiń senimdi odaqtasy ári iri saýda seriktesi sanalady.
Jeksenbi kúni sońǵy birneshe kún Majarstanda saparda bolǵan Netanıahý Vashıngtonǵa ushyp keldi jáne búgin Tramppen kezdesý ótkizedi.
Prime Minister Benjamin Netanyahu:
— Prime Minister of Israel (@IsraeliPM) April 6, 2025
"I have just finished a very important visit to Hungary. Hungary is a great friend of Israel. It defends us in the European Union and the UN.https://t.co/itdKXRclAe pic.twitter.com/khah5pZK7z
Izraıl premer-mınıstri kelissózder soǵystyń 18 aıynan keıin de Gaza sektorynda áli tutqynda otyrǵan ızraıldikterge, Palestına anklavynda jeńiske jetýge jáne Izraılge qatysty tarıf rejımi talqylaýǵa qatysty bolatynyn aıtty.
Netanıahý keńsesi «Izraıl-Túrkııa qarym-qatynasy, Iran qaýpi jáne Halyqaralyq qylmystyq sotpen teketires» te kún tártibinde bolatynyn habarlady.
— Men bul máselede kómek bere alamyn dep úmittenemin. Osyndaı nıet bar. Men Izraıl ekonomıkasy úshin de óte mańyzdy osynaý másele boıynsha prezıdent Tramppen kezdesetin alǵashqy halyqaralyq kóshbasshymyn, birinshi sheteldik kóshbasshymyn. Muny óz ekonomıkalaryna qatysty jasaǵysy keletin birqatar kóshbasshy bar. Menińshe, bul erekshe jeke baılanysty, sonymen qatar qazirgi ýaqytta asa mańyzdy AQSh pen Izraıl arasyndaǵy erekshe baılanysty kórsetedi, — dedi Netanıahý.
Izraıl premer-mınıstri Vashıngtonǵa kelgen bette Bler úıinde AQSh-tyń Saýda mınıstri Govard Lıýtnıkpen jáne Saýda ókili Djeımıson Grırmen kezdesip úlgerdi. Netanıahý keńsesiniń málimetinshe, kezdesý «jyly ári nátıjeli» boldy.
Reuters anonımdi derekkózderge silteme jasap habarlaýynsha, Tramp kútpegen shaqyrýdy 4 sáýirde Netanıahýmen telefon arqyly sóıleskende, Izraıl basshysy tarıfter máselesin kótergen kezde jasaǵan.
Izraıl Tramp ákimshiliginiń jańa tarıfterin kúte otyryp, 1 sáýirde AQSh ımportyna qatysty qalǵan baj salyǵyn alyp tastaǵan edi. Eki el 40 jyl buryn erkin saýda týraly kelisimge qol qoıǵan jáne endi AQSh taýarlarynyń shamamen 98 paıyzyna salyq salynbaıdy.
Izraıldik buqaralyq aqparat quraldarynyń habarlaýynsha, Izraıldiń memlekettik «Sıon qanaty» ushaǵy Býdapeshtten Vashıngtonǵa deıingi aralyqty shamamen 400 shaqyrymǵa uzartatyn baǵytpen ushyp kelgen. Bul ushaq shuǵyl qonýǵa májbúr bolǵan jaǵdaıda Halyqaralyq qylmystyq sottyń qamaýǵa alý orderin oryndaýy múmkin dep esepteletin elderdiń ústinen ushýdan aýlaq bolý úshin jasalǵan.
Izraıl Gazadaǵy boljamdy áskerı qylmystar úshin Halyqaralyq qylmystyq sot bergen orderdi Irlandııa, Islandııa jáne Nıderlandy oryndaýy múmkin dep qaýiptenedi. Sondyqtan Netanıahý ushaǵy Horvatııa, Italııa jáne Frantsııa áýesimen ushyp ótti. Premer-mınıstr mingen Izraıl ushaǵy tutqynǵa alyný qaýpin boldyrmaý úshin balama baǵyttardy ustanǵany birinshi ret emes ekeni de aıtylady.