Netanıahý Trampqa «Hezbollaǵa» qarsy operatsııadan estelik peıdjerlerin syılady
ASTANA. KAZINFORM — Izraıl premeri Bınıamın Netanıahý 4 aqpanda Vashıngtonda AQSh prezıdenti Donald Tramppen kezdesýde oǵan «Hezbollaǵa» qarsy operatsııadan estelik retinde «jaı jáne altyn jalatylǵan» eki peıdjer syıǵa tartty.
TASS málimetinshe, Donald Tramp óz kezeginde «bul aýqymdy operatsııa bolǵanyn» málimdedi.
2024 jyldyń 17-18 qyrkúıeginde Lıvannyń ártúrli bólikterinde baılanys qurylǵylarynyń, atap aıtqanda peıdjerler men ratsııalar jarylysy boldy. Respýblıka bıliginiń málimetinshe, 37 adam qaza taýyp, 3 myńnan astamy jaralanǵan. Lıvandaǵy Hezbolla uıymy jarylystarǵa Izraıldi aıyptady. Evreı memleketi bastapqyda bul operatsııaǵa óziniń qatysy bar ekenin resmı túrde moıyndamady, biraq sol jyldyń 11 qarashasynda Gendelman TASS agenttigine Lıvandaǵy baılanys qurylǵylaryn jarý operatsııasyn Netanıahýdyń jeke ózi maquldaǵanyn aıtty.
4 aqpan kúni Netanıahý men Tramptyń kezdesýi bes saǵatqa sozyldy jáne AQSh prezıdentiniń «Premer-mınıstrdi Aq úıdiń syrtynda ózi qarsy alýynan bastaldy», — dedi premer-mınıstr keńsesiniń keńesshisi.
— Bul tarıhı sapar boldy, biraq bárinen buryn bul Amerıka prezıdenti men Izraıl premer-mınıstri arasyndaǵy tarıhtaǵy eń dostyq kezdesý boldy, — dep atap ótti Gendelman.
Onyń aıtýynsha, Tramp «premer-mınıstrge «Bıbı — (Benıamın Netanıahý) uly kóshbasshy» degen qoltańbasy bar fotosýret syıǵa tartty.
Kezdesý barysynda Netanıahý Trampqa «Izraılge soǵys kezinde qarý-jaraq jetkizýge qoıylǵan shekteýlerdi alyp tastaǵany úshin, sondaı-aq Izraıl men onyń premer-mınıstrine sózsiz qoldaý kórsetkeni úshin alǵys aıtty», — dep qosty Gendelman.
Ol «Tramp Izraıl negizi qalanǵan kezden beri mazalap júrgen máselelerge jańa sheshimder usynǵanyn» atap ótti.
Eske salsaq, dúısenbide Izraıl premer-mınıstri Benıamın Netanıahý AQSh prezıdenti Donald Tramppen kezdesý úshin Vashıngtonǵa kelgeni habarlandy.
Netanıahý AQSh-tyń Taıaý Shyǵystaǵy arnaıy Ókili Stıven Ýıtkoffpen Izraıl men HAMAS arasyndaǵy atysty toqtatý jáne basqa da aımaqtyq máseleler boıynsha kelissózder júrgizetini aıtyldy.