Netanıahý soǵys kezinde BAÁ-ge barǵanyn málimdedi – Abý-Dabı muny joqqa shyǵardy
ASTANA. KAZINFORM – Izraıl premer-mınıstriniń keńsesi Bınıamın Netanıahýdiń Iranmen soǵys kezinde Birikken Arab Ámirlikterine jasyryn baryp, osy eldiń basshysymen kelissóz júrgizgenin málimdedi. Al BAÁ bıligi bul aqparatty «múldem negizsiz» dep atady. Bul týraly VVS jazdy.
Izraıl men AQSh Iranǵa qarsy júrgizip jatqan soǵys barysynda Iran áskeri birneshe ret BAÁ aýmaǵyna soqqy jasaǵan. Sondaı-aq Tegeran Ámirlikter bıligin AQSh pen Izraılmen tym jaqyn baılanysta dep únemi synap keledi.
Sársenbi keshinde Netanıahý keńsesi X áleýmettik jelisinde qysqa habarlama jarııalap, onda Izraıl premeri men BAÁ prezıdenti Muhammed ben Zaıd Ál Nahaıan arasyndaǵy kezdesý eki el arasyndaǵy qarym-qatynasta «tarıhı serpiliske» alyp kelgeni aıtylǵan.
Kóp uzamaı BAÁ Syrtqy ister mınıstrligi Izraıl taratqan aqparattyń shyndyqqa sáıkes kelmeıtinin málimdedi.
– BAÁ Izraılmen qarym-qatynasy ashyq sıpatta ekenin, onyń negizinde barshaǵa belgili ári resmı túrde jasalǵan Avraam kelisimderi jatqanyn atap kórsetedi. Bul baılanystar jabyq nemese beıresmı ýaǵdalastyqtarǵa negizdelmegen. Sondyqtan BAÁ bıligi resmı túrde jarııalamaǵan kez kelgen qupııa saparlar nemese jasyryn kelisimder týraly málimdemeler múldem negizsiz, – delingen vedomstvo málimdemesinde.
Avraam kelisimderi — Izraıl, BAÁ jáne birneshe arab memleketi arasyndaǵy qarym-qatynasty qalypqa keltirýge baǵyttalǵan qujattar. Olar 2020 jyly Donald Tramp prezıdenttiginiń alǵashqy kezeńinde qol qoıylǵan.
Reuters agenttigi aqparattanǵan derekkózge silteme jasap, Netanıahý men BAÁ prezıdenti arasyndaǵy kezdesý Oman shekarasyna jaqyn ornalasqan El-Aın qalasynda ótkenin jáne birneshe saǵatqa sozylǵanyn habarlady.
BAÁ syrtqy saıasat vedomstvosynyń málimdemesi jarııalanar aldynda el prezıdentiniń keńesshisi Anvar Gargash Abý-Dabıdiń máselelerdi saıası jáne dıplomatııalyq jolmen sheshýdi qoldaıtynyn, biraq ózin qorǵaý quqyǵyn saqtaıtynyn aıtqan.
Eske sala ketsek, jaqynda Izraıl 2023 jylǵy 7 qazandaǵy atys úshin ólim jazasyn taǵaıyndaıtyn zań qabyldady.
