Netanıahý kepilge alynǵandardy qaıtarǵandarǵa aqsha ýáde etti
ASTANA. KAZINFORM – Izraıl premer-mınıstri Bınıamın Netanıahý Izraılge kem degende bir kepildi qaıtarǵan kez kelgen adam otbasymen birge Gaza sektorynan aman-esen shyǵyp kete alatynyn jáne bes mıllıon dollar alatynyn aıtty. Bul týraly RIA Novostı jazdy.
– Men bul jaǵdaıdan arylǵysy keletinderge ótinish aıtamyn. Izraıldik tutqyndardyń kem degende bireýin bizge tapsyrǵan adam otbasymen birge Gazadan aman-esen shyǵa alady, tańdaý ózderińde, – dedi Netanıahý Gazaǵa sapary kezinde.
2023 jyldyń 7 qazanynda Izraıl Gaza sektorynan buryn-sońdy bolmaǵan zymyrandyq shabýylǵa ushyrady. Osydan keıin palestınalyq HAMAS qozǵalysynyń sodyrlary shekaralyq aımaqtarǵa kirip, áskerıler men beıbit turǵyndarǵa oq jaýdyryp, 200-den astam adamdy kepilge aldy. Bıliktiń málimetinshe, sol kúni Izraıl jerinde 1,2 myńǵa jýyq adam qaza tapqan.
Buǵan jaýap retinde Izraıl qorǵanys kúshteri azamattyq nysandarǵa shabýyldardy qamtıtyn «Temir qylyshtar» operatsııasyn bastady jáne Gaza sektoryn tolyq qorshaý týraly jarııalady: sý, elektr qýaty, otyn, azyq-túlik jáne dári-dármek jetkizý toqtatyldy.
Izraıldiń 2023 jylǵy 7 qarashada jasaǵan soqqysynan beri Gaza sektorynda qaza tapqandardyń sany 44 630 adamǵa jetken, onyń ishinde 16 765 bala bar. Bul týraly Palestına úkimeti málim etken.
