Netanıahý keńsesi: Izraıl Doha shabýyly úshin jaýapkershilikti tolyq óz moınyna aldy
ASTANA. KAZINFORM — Premer-mınıstr Bınıamın Netanıahý keńsesi Dohaǵa jasalǵan shabýyldyń bastalǵanyn jáne ol úshin tolyq jaýapkershilikti el óz moınyna alǵanyn málimdedi, dep habarlaıdy Al Jazeera.
— Búgingi HAMAS lańkesteriniń jetekshilerine qarsy aktsııa Izraıldiń táýelsiz operatsııasy boldy, — delingen Netanıahý keńsesiniń áleýmettik jelidegi málimdemesinde.
Izraıl oppozıtsııasynyń qazirgi basshysy ıAır Lapıd Dohadaǵy shabýyldy joǵary baǵalady.
— Áýe kúshterin, TsAHAL, ShABAK jáne barlyq qaýipsizdik kúshterin jaýdyń áreketin toqtatýǵa arnalǵan erekshe operatsııasy úshin quttyqtaımyz, — dep jazdy Lapıd áleýmettik jelide.
Seısenbi kúni Qatar astanasy Dohada birneshe jarylys boldy. Izraıl qorǵanys kúshteri bul aqparattan keıin kóp uzamaı HAMAS tobynyń joǵarǵy basshylyǵyna shabýyl jasaǵanyn habarlady. Al Jazeera-nyń habarlaýynsha, Dohadaǵy shabýyl Gaza sektoryndaǵy qaqtyǵysty retteý boıynsha kelissózderge qatysyp jatqan palestınalyq HAMAS qozǵalysynyń delegatsııasyn nysanaǵa alǵan.
TsAHAL beıbit turǵyndarǵa keltirilgen shyǵyndy shekteý úshin sharalar qabyldanǵanyn aıtty. Shabýyldyń saldary týraly habarlanǵan joq.
Alaıda, Al Arabiya agenttiginiń habarlaýynsha, Gaza sektoryndaǵy HAMAS qozǵalysy jetekshileriniń biri Halıl ál-Heııa Izraıldiń Dohaǵa jasaǵan soqqysynan qaza tapqan.
Qatar bıligi shabýyldyń HAMAS músheleri turatyn úılerdi nysanaǵa alǵanyn jáne Izraıldiń áreketin aıyptaǵanyn aıtty.
Qatar Syrtqy ister mınıstrliginiń baspasóz hatshysy Madjıd ál Ansarı «bul qylmystyq shabýyl barlyq halyqaralyq zańdar men normalardy óreskel buzý jáne qatarlyqtar men Qatar turǵyndarynyń qaýipsizdigine úlken qaýip tóndiredi» dedi.
— Qatar Izraıldiń uqypsyz áreketine jáne aımaqtyq qaýipsizdikke nuqsan keltirýin jalǵastyra berýge, sondaı-aq onyń qaýipsizdigi men egemendigine baǵyttalǵan kez kelgen áreketterge jol bermeıdi, — dedi ál-Ansarı.
Onyń aıtýynsha, Qatar «joǵary deńgeıde» tergeý júrgizip jatyr.
Buǵan deıin Qasym-Jomart Toqaev Izraıl bıliginiń Dohadaǵy áskerı áreketin aıyptaǵanyn jazǵanbyz.