Netanıahý Izraıl prezıdentinen keshirim surady
ASTANA. KAZINFORM – Birqatar sybaılas jemqorlyq isi boıynsha tergelip jatqan Izraıl premer-mınıstri el prezıdenti Itshak Gertsogke resmı ótinish jiberip, ózine keshirim jasaýdy surady, dep habarlaıdy DW.
Prezıdent keńsesiniń málimeti boıynsha, ótinish eki qujattan turady: premer-mınıstrdiń advokaty Amıt Hadad qol qoıǵan 111 bettik ótinish jáne Bınıamın Netanıahý jeke qol qoıǵan hat.
Gertsogtiń keńsesi qujattardyń prezıdent keńsesiniń Zań bólimine berilgenin, sol jerden olar Izraıl Ádilet mınıstrligine jiberiletinin málimdedi. Tıisti departament «barlyq mınıstrlik organynyń pikirin jınap, sodan keıin olardyń usynystaryn Prezıdent keńsesindegi Zań keńesshisine jiberedi», ol sońǵy sheshimdi qabyldaıdy.
2019 jyly Netanıahýǵa sybaılas jemqorlyq, alaıaqtyq jáne bılikti teris paıdalaný boıynsha úsh aıyp taǵyldy. Buǵan mıllıarder dostarynan baǵaly syılyqtar alý jáne BAQ magnattaryna jaǵymdy aqparat berý úshin kómek kórsetý kiredi. Netanıahý ózine qarsy qozǵalǵan qylmystyq is boıynsha kýálik bergen alǵashqy Izraıl premer-mınıstri boldy. Ol aıyptaýlardy joqqa shyǵarady.
2025 jyldyń qazan aıynda AQSh prezıdenti Donald Tramp Izraıl parlamentinde sóılegen sózinde Izraıl premer-mınıstrine keshirim jasaýdy usyndy. Qarasha aıynyń basynda jergilikti BAQ prezıdent Gertsogtiń Tramptan Netanıahýǵa keshirim jasaýdy usynǵan resmı hat alǵanyn habarlady.
Izraıl prezıdenti Netanıahýǵa raqymshylyq jasaý múmkindigi týraly aıtty.