Netanıahý: Izraıl Iranmen kez kelgen sátte qaıta soǵysýǵa daıyn
ASTANA. KAZINFORM – Izraıl premer-mınıstri Bınıamın Netanıahý Iranmen qajet bolǵan jaǵdaıda kez kelgen sátte qaıtadan áskerı qaqtyǵysqa kirisýge daıyn ekenin málimdedi, dep jazdy Euronews.
Onyń aıtýynsha, Tegeran men Vashıngton arasynda eki aptalyq bitim jasalǵanyna qaramastan, Izraıl óz maqsattarynan bas tartpaıdy.
«Aıqyn aıtqym keledi: bizde áli de oryndalýy tıis mindetter bar jáne biz olarǵa kelisim arqyly nemese áskerı is-qımyldardy qaıta bastaý arqyly jetemiz», – dedi ol teledıdar arqyly jasaǵan málimdemesinde.
Sondaı-aq premer-mınıstr Izraıl kez kelgen ýaqytta áskerı áreketterdi qaıta bastaýǵa ázir ekenin atap ótti.
«Biz kez kelgen sátte urys qımyldaryna qaıta oralýǵa daıynbyz. Bizdiń saýsaǵymyz áli de shúrippede tur. Bul naýqannyń sońy emes, barlyq maqsatymyzǵa jetý jolyndaǵy bir kezeń ǵana», – dedi ol.
Netanıahý Iran qazirgi ýaqytta «álsiregen jáne buryn-sońdy bolmaǵan deńgeıde áljýaz kúıde» ekenin alǵa tartty.
Ol sondaı-aq oppozıtsııa ókilderiniń bitimge qatysty synyna jaýap berdi. Izraıl oppozıtsııasynyń jetekshisi ıAır Lapıd bul kelisimdi «dıplomatııalyq apat» dep atap, úkimet soǵys maqsattaryna jete almaǵanyn málimdegen.
Izraıl premer-mınıstri Irannyń ıadrolyq baǵdarlamasyn joıý nemese aıtarlyqtaı álsiretý soǵystyń negizgi maqsaty ekenin aıtty. Ol bul baǵdarlamany Izraıl úshin «ekzıstentsıaldyq qaýip» dep atady.
Sonymen qatar, Netanıahý Irannyń ballıstıkalyq zymyran áleýetin, eldegi saıası rejımdi álsiretý nemese ózgertý, sondaı-aq Tegerannyń óńirlik yqpalyn odaqtastaryna soqqy berý arqyly shekteý mindetterin atap ótti.
Premer-mınıstrdiń aıtýynsha, áskerı naýqan barysynda Izraıl aıtarlyqtaı nátıjelerge qol jetkizgen.
«Biz tek daıyn zymyrandardy ǵana emes, olardy óndiretin zaýyttardy da joıdyq. Qazir Iran óz qorynda qalǵan zymyrandardy ǵana qoldanýda, al bul qor kún sanap azaıyp keledi», – dedi ol.
Sondaı-aq Izraıl tarapy Irannyń ıadrolyq baǵdarlamasyna eleýli soqqy jasalǵanyn málimdedi.
«Biz mańyzdy ınfraqurylym nysandary men tsentrıfýgalardy joıý arqyly Irannyń ıadrolyq baǵdarlamasyna aýyr soqqy berdik», – dedi Netanıahý.
Onyń aıtýynsha, Izraıl baıytylǵan ýrandy Iran aýmaǵynan shyǵarýdy da qamtamasyz etedi.
Budan bólek, Izraıl Irannyń Islam revolıýtsııasy saqshylary korpýsynyń qarjylyq jáne qarý-jaraq óndirisi jelilerin joıǵanyn habarlady. Sondaı-aq áskerı operatsııalar barysynda metallýrgııa zaýyttary, munaı-hımııa keshenderi jáne kólik ınfraqurylymy nysandary zaqymdanǵan.
«Biz rejımniń repressıvtik apparatyna da aýyr soqqy berdik. Myńdaǵan sodyr joıyldy jáne biz olardyń kez kelgen jerine jete alatynymyzdy kórsettik», – dedi Izraıl premer-mınıstri.
Sonymen qatar ol AQSh-pen yntymaqtastyqtyń mańyzyn atap ótti.
«Biz birge Taıaý Shyǵys tarıhyndaǵy eń iri operatsııalardyń birin bastadyq. Izraıl men AQSh arasyndaǵy mundaı seriktestik buryn-sońdy bolmaǵan», – dedi Bınıamın Netanıahý.
Aıta keteıik, Izraıl Iranǵa shabýyldaryn toqtatqanymen Lıvandaǵy operatsııalaryn jalǵastyryp jatyr.