Netanıahý: Izraıl Gazaǵa qatysty dıplomatııaǵa daıyn, biraq kúsh qoldanýǵa da ázir
ASTANA. KAZINFORM — Izraıl Gaza sektoryndaǵy qaqtyǵysty dıplomatııalyq jolmen retteýge kelisedi. Bul týraly premer-mınıstr Bınıamın Netanıahý AQSh-qa sapary barysynda málimdedi. Izraıl halqyna joldaǵan beıneúndeýdi el premeri keńsesi jarııalady, dep TASS agenttigi.
Netanıahý Izraıl anklavta 60 kúndik atysty toqtatýǵa kelisetinin, biraq HAMAS radıkaldy palestınalyq qozǵalysyn bılikten alastatyp, sektordy tolyǵymen qarýsyzdandyrýdy talap etetinin atap ótti.
— Eger dıplomatııa nátıje bermese, Izraıl bul maqsatqa áskerı jolmen jetýge nıetti, — dedi premer.
Ol 9 shildede AQSh-ta Gazadaǵy tutqyndardyń týystarymen kezdesýde osy ustanymdy jetkizgenin aıtty.
— Biz barlyq (urlanǵan) azamattarymyzdy qaıtarýǵa bel býdyq. Biz qazir tiri jáne qaza tapqan tutqyndardyń jartysyn qaıtarýǵa tyrysyp jatyrmyz, al bul úshin 60 kúndik atysty toqtatý usynyldy. Osy ýaqytsha bitimniń basynda soǵysty birjola toqtatý týraly kelissózder bastalady. Muny iske asyrý úshin biz usynǵan negizgi sharttar oryndalýy kerek: HAMAS qarý-jaraǵyn tastaıdy, Gaza qarýsyzdandyrylady, bul jerde HAMAS-tyń basqarý ne áskerı áleýeti qalmaýy tıis. Bul — bizdiń negizgi talabymyz. Eger muny kelissóz arqyly iske asyrý múmkin bolsa — quptarlyq. Eger 60 kún ishinde bul nátıjege qol jetkizilmese, onda biz buǵan basqa jolmen — batyr armııamyzdyń kúshimen jetemiz, — dedi premer-mınıstr.
Ol mundaı tásildi jaqynda AQSh ta qoldanǵanyn eske saldy: Tegerannyń ıadrolyq baǵdarlamasyna qatysty kelissózderge 60 kún bólinip, 13 maýsymda Izraıl Iranǵa qarsy 12 kúndik áskerı operatsııa bastaǵan.
— Biz Iran men onyń ıadrolyq qaýip-qaterine qatysty da dál osylaı aıtqan edik. Meniń oıymsha, biz óz sheshimimizdi, kúshimizdi jáne barlyq maqsattarymyzǵa qol jetkizýge degen tabandylyǵymyzdy kórsettik. Taǵy da aıtamyn: eger HAMAS-ty qarýsyzdandyrý men onyń áleýetin joıý kelissózder arqyly júzege assa — jaqsy. Biraq kez kelgen jaǵdaıda bul oryndalady, — dedi Netanıahý.
Buǵan deıin Netanıahý Izraıl egemen Palestına memleketiniń qurylýyna kelispeıtinin málimdegen bolatyn.