Netanıahý: Izraıl Gaza sektoryn tolyq baqylaýyna alady
ASTANA. KAZINFORM — Izraıl Premer-mınıstri Bınıamın Netanıahý Izraıl Gaza sektorynyń búkil aýmaǵyn baqylaýǵa alýǵa nıetti ekenin málimdedi. Bul týraly ol 19 mamyr, dúısenbi kúni óziniń Telegram-arnasynda jarııalaǵan vıdeoúndeýinde aıtty, dep jazady DW.
— Qarqyndy urystar júrip jatyr, biz alǵa jyljyp kelemiz. Biz búkil sektordy baqylaýǵa alamyz. Biraq bul úshin bizdi eshteńe toqtata almaıtyndaı áreket etýimiz kerek, — dedi Netanıahý.
Onyń aıtýynsha, ásker aımaqta tártipti qamtamasyz etip, gýmanıtarlyq kómektiń tonalýyna jol bermeýi tıis.
Gaza sektoryna gýmanıtarlyq kómek
Izraıl úkimeti 19 mamyrdan bastap Gaza sektoryna gýmanıtarlyq kómek jetkizýge qaıta ruqsat berdi. BUU men basqa da baqylaýshy uıymdar buǵan deıin birneshe ret eskertip, kómek bolmasa palestın halqy ashtyqqa ushyraıtynyn málimdegen edi. Kómek Dúnıejúzilik azyq-túlik baǵdarlamasy (WFP) men World Central Kitchen uıymy arqyly jetkiziledi. Izraıl áskeri men qaýipsizdik kúshteri olardyń aımaqqa kirýin baqylaıdy.
Izraıl bıligi naýryz aıynyń basynda gýmanıtarlyq kómekti ótkizýge tyıym salǵan. Úkimettiń málimdeýinshe, aımaqta áreket etetin HAMAS lańkestik uıymynyń sodyrlary kómekti ıemdenip, qaıta satyp, qarý-jaraq úshin qarjy taýyp jatyr.
Gaza sektoryndaǵy jańa shabýyl
Izraıl Qorǵanys armııasynyń (TsAHAL) jańa aýqymdy shabýyly 17 mamyrda bastaldy. Izraıl kúshteri aımaqtyń soltústiginde, onyń ishinde Gaza qalasy mańynda operatsııalaryn keńeıtti. Urystyń maqsaty — radıkaldy ıslamıstik HAMAS tobyn joıý jáne 2023 jylǵy 7 qazanda HAMAS urlap áketken tutqyndardy bosatý.
TsAHAL kún saıyn Gaza sektoryndaǵy nysandarǵa soqqy berip jatyr. Palestınalyq WAFA agenttiginiń habarlaýynsha, 19 mamyr kúni túnde Izraıl Han-ıÝnıs qalasyna jappaı áýe shabýylyn jasaǵan. Saldarynan 17 adam qaza tapty. Agenttik olardyń HAMAS sodyrlary ma, álde beıbit turǵyndar ma naqtylamaǵan.
Taıaý Shyǵystaǵy jaǵdaıdyń ýshyǵýy
2023 jylǵy 7 qazanda HAMAS qozǵalysy Izraılge jappaı shabýyl jasap, Taıaý Shyǵystaǵy jaǵdaı kúrt ýshyǵyp ketti. Eýropalyq Odaq pen AQSh-ta lańkestik uıym dep tanylǵan HAMAS Izraılge zymyranmen soqqy berip, el aýmaǵyna basyp kirip, Izraıl tarıhyndaǵy beıbit turǵyndarǵa qarsy eń jappaı qyrǵyn jasady — shamamen 1200 adam qaza tapty. Sonymen qatar 250-den astam adam tutqynǵa alynyp, Gaza sektoryna áketildi. Olardyń bir bóligi aıyrbastaldy nemese bosatyldy, qalǵandary qaza tapqan.
Jaýap retinde Izraıl HAMAS-qa soǵys jarııalady. HAMAS baqylaýyndaǵy densaýlyq saqtaý mınıstrliginiń dereginshe, Gaza sektoryndaǵy qurlyq operatsııalary men bombalaý kezinde 53 myńnan astam palestınalyq qaza tapty, taǵy 120 myńnan astamy jaralandy. Alaıda bul statıstıkada qansha sodyrdyń kóz jumǵany naqty kórsetilmegen.
Aıta keteıik, buǵan deıin Gaza sektoryna jýyrda jasalǵan soqqylarda tórt jýrnalıst mert bolǵanyn jazdyq.