Netanıahý: Izraıl áskeri aldaǵy birneshe kúnde Gazaǵa «tolyq kúshpen» kiredi

ASTANA.KAZINFORM — Bınıamın Netanıahý seısenbi kúni Izraıl qorǵanys armııasy (TsAHAL) «operatsııany tolyq aıaqtap, HAMAS-ty joımaıynsha toqtamaıtynyn» málimdedi, dep habarlaıdy Euronews.

— Aldaǵy kúnderi biz operatsııany aıaqtap, HAMAS-ty talqandaý úshin Gaza sektoryna tolyq kúshpen kiremiz. Biz soǵysty toqtatatyn jaǵdaı bolmaıdy. Ýaqytsha bitim bolýy múmkin [kepilge alynǵandardy bosatý maqsatynda], biraq biz sońyna deıin baramyz, — dep málimdedi seısenbi kúni Izraıl premer-mınıstri Bınıamın Netanıahý.

Sondaı-aq Netanıahý Gazadan halyqtyń bir bóligin basqa elderge kóshirý máselesin de qozǵady. Bul usynysty jyl basynda Donald Tramp aıtqan bolatyn, alaıda ony arab elderi men halyqaralyq qaýymdastyqtyń edáýir bóligi birden qabyldamaı tastaǵan edi.

— Biz olarǵa kóshýge múmkindik beretin ákimshilik qurdyq, biraq másele bir-aq nársege tireledi: bizge olardy qabyldaýǵa daıyn elder kerek. Qazir osy baǵytta jumys istep jatyrmyz. Eger biz olarǵa kóshý múmkindigin usynsaq, meniń oıymsha, 50 paıyzdan astamy ketedi, tipti budan da kóbi. Biraq HAMAS ol jerde (Gazada) endi bolmaıdy, — dedi Netanıahý.

Buǵan deıin osy aıda Izraıl Gaza sektorynyń búkil aýmaǵyn basyp alyp, ony belgisiz merzimge okkýpatsııalaý josparyn bekitken bolatyn. Bul 18 naýryzda eki aılyq bitimnen keıin áskerı is-qımyldardy qaıta bastaǵannan soń jarııalandy.

Eske sala keteıik, buǵan deıin Netanıahý Izraıldiń AQSh-tyń áskerı kómeginen bas tartýy múmkin ekenin de málimdegen edi.